Электромонтер кыыска холуобунай дьыала тэрилиннэ

Ааптар: 
Бөлөххө киир:

Кыргыттар, дьахталлар да ортолоругар арыгы истэхтэринэ муора тобуктарынан буолан айдаарааччылар, охсуһа-аахса сатааччылар баар буолааччылар. Ол кырыгырбыттарын киминэн баҕарар таһаарыахтарын сөп. 

edersaas.ru


Мирнэй оройуонугар электромонтерунан үлэлиир 25 саастаах кыыска РФ Холуобунай кодексатын 318-с ыст. 2-с чааһынан холуобунай дьыала тэрилиннэ. Ол эбэтэр, былаас бэрэстэбиитэлэ дуоһунаһын эбээһинэһин толорор кэмигэр доруобуйатыгар кутталлаах күүһү туттуу бэлиэтэ баарынан.

Силиэстийэ сабаҕалыырынан, от ыйын 26 күнүгэр Айхал бөһүөлэгэр «стоянкаҕа» харабыллааһын отделын полицейскайдара массыынатыгар итирик олорор суоппары туппуттар уонна ГИБДД иниспиэктэрдэрин ыҥырбыттар.

Ону атын массыынанан айаннаан испит кыыс көрөн, табаарыһын тоҕо туппуттарын быһаарсарга санаммыт. Бэйэтэ эмиэ уруулга холуочук олорбут эрээри, онтуттан ончу кыбыстыбакка, бэрт улаханнык хаһыытаан-ыһыытаан, ыыс-бурут тылларынан үөхсэн, ыйытааччы буолбут.

Онуоха биир полицейскай кинини полиция отделениетыгар барсарга, уолу тоҕо туппуттарын онно быһаарарга уонна киниэхэ бэйэтигэр эмиэ административнай боротокуол толорорго эппит.

Кыыс, дьэ, онно буолан-хаалан турбут, бу полицейскайы тэбэн саайбыт. Онон, кинини эмиэ тутан, отделга илдьибиттэр.

Силиэстийэ иннинээҕи бэрэбиэркэ кэмигэр биллибитинэн, бу кыыс олорор сириттэн мөлтөх характеристикалаах, административнай эппиэккэ хаста да тардылла сылдьыбыт эбит.

Бу туһунан РФ Силиэстийэлиир кэмитиэтин Саха сиринээҕи управлениета иһитиннэрдэ.

Вера МАКАРОВА, «Саха сирэ» хаһыат, edersaas.ru

Хаартыска: интэриниэттэн.

+1
0
+1
0
+1
0
+1
0
+1
0
+1
0
+1
0