“Биир ньыгыл Россия” политическай баартыйа бэрэссэдээтэлэ Дмитрий Медведев регионнааҕы уопсастыбаннай приемнайын үлэһиттэрэ, “Биир ньыгыл Россия” баартыйа фракциятын чилиэннэрэ, Госдуума уонна Ил Түмэн дьокутааттара гражданнары күн аайы көрсөллөр.
Бүгүн Уопсастыбаннай приемнай салайааччыта, Ил Түмэн дьокутаата, Ил Түмэн аҕыйах ахсааннаах хотугу төрүт олохтоох омуктар уонна Арктика дьыалаларыгар кэмитиэтин бэрэссэдээтэлэ Елена Голомарева Инбэлииттэр, Хараҕынан көрбөттөр уонна Истибэттэр Дьокуускай куораттааҕы итиэннэ өрөспүүбүлүкэтээҕи уопсастыбаларын бэрэстэбиитэллэрин кытары көрүстэ. Ыарыһах, доруобуйаларынан хааччахтаах дьон туруорсар боппуруоһа элбэх. Ол курдук, эмтиир-чэбдигирдэр тэрилтэлэр путевкаларыгар дэбигис тииһиммэт буоланнар, Доруобуйа харыстабылын министиэристибэтиттэн уонна тустаах биэдэмистибэлэртэн салааларынан (гериатрияҕа, харах балыыһатыгар, санаторийга, куруорка, протеһы оҥорторууга…) уопсастыба ахсын биэстии путевканы биэрэргэ этэллэр. Куоракка эти-сиини эрчийэргэ-чэбдигирдэргэ анаммыт, толору хааччыллыылаах тренажернай саалалардаах, бассейнаах хас да спорт дыбарыаһа баар эрээри, олор ааннара кыаммат дьоҥҥо сабыылаах. Улахан кэпсэтии түмүгүнэн “Самородок” комплекс доруобуйаларынан хааччахтаах дьон дьарыктанарыгар бириэмэ анаабыт: сарсыарда 7 чааска итиэннэ киэһэ 9 чааска! Дьэ, хайа ыарыһах, хайа инбэлиит бу кэмҥэ кыайан кэлиэҕэй? Тоҕо сатамматый сарсыарда 9-10 чаастан көҥүллүүр? Билигин бэл, чэгиэн-чэбдик дьон оҕолорун детсадка биэрэллэрэ уустук, оттон бэйэлэрэ сүүрэн-көтөн, кэпсэтэн-ипсэтэн, электроннай уочаракка турар кыаҕа суох инбэлииттэргэ бу төрүт кыаллыбат суол. Ити иһин, Үөрэх министиэристибэтэ уонна куораттааҕы үөрэх управлениета доруобуйаларынан хааччахтаах дьон оҕолорун детсадка уонна оскуолаҕа ыларга миэстэ биэрэллэрэ наада. Сокуону, быраабы билбэтиттэн эрэйдэнэр, албыҥҥа киирэн биэрэр, туох чэпчэтиинэн туһанар бырааптааҕын билбэт дьоҥҥо өйдөтөр-сырдатар, биллэрэр үлэ киэҥник уонна тиһигин быспакка ыытыллыахтаах. Котенко уулуссаҕа баар психоневрологическай диспансер болҕомтону эмиэ эрэйэр. Быстахтык ыллахха, манна эмтэнии куурсун ааспыт ыарыһаҕы таах таһааран кэбиһэллэр, кини салгыы ханна барарын, көрөр-истэр дьоннооҕун дуу, суоҕун дуу быһаара барбаттар. Дьиэ-уот былдьаһыытыгар сорох инбэлииттэри аймахтара дьиэлэриттэн үүрэллэр. Маннык дьон ханна барыахтарай? Дьокуускайдааҕы быстах олорор дьиэлэр куоракка пропискалаах, бэйэлэрин хааччынар кыахтаах дьону эрэ ылаллар. Итинтэн күһэллэн, ханна да барара суох дьон инбэлииттэр (көрбөттөр, истибэттэр) уопсастыбаларыгар эбэтэр баартыйа Уопсастыбаннай приемнайыгар кэлэллэр. Кинилэргэ анаан инбэлииттэр уонна кырдьаҕастар интэринээт-дьиэлэригэр, социальнай дьиэлэргэ кубуотаны көрөр кэм ирдэбилэ буола. Дьиҥинэн Елена Христофоровна Краснояров уулуссаҕа баар Көрбөттөр уопсастыбаларын учаастагар чөлүгэр түһэрэр кииннээх социальнай дьиэни туттарарга үлэлэһэр даҕаны, билиҥҥитэ өйөбүл суох…
— Көрсүһүү түмүгүнэн инбэлииттэр, хараҕынан көрбөттөр уонна истибэттэр Дьокуускай куораттааҕы итиэннэ өрөспүүбүлүкэтээҕи уопсастыбаларын бэрэстэбиитэллэрин этиилэрин ылынан, биһиги салааларынан кубуоталары көрөргө туруорсан тустаах министиэристибэлэргэ уонна биэдэмистибэлэргэ суруктары ыытан эрэбит, — диир Елена Христофоровна көмөлөһөөччүтэ Светлана Михайлова. — Быһаарыллыахтарыгар диэри бу боппуруостары хонтуруолга тутуохпут.
Раиса Сибирякова, “Саха сирэ” хаһыат, edersaas.ru.
Көрсүһүү кэмигэр.