Муус устар 21 күнүгэр 15.30 ч. муусука кэллиэһин улахан саалатыгар СӨ Доруобуйа харыстабылын үлэһиттэрин идэлээх сойууһун рескомун хорун «Друзья, для вас души порывы» диэн үбүлүөйдээх кэнсиэрэ буолар.
«Вдохновение» хор доруобуйа харыстабылын үлэһиттэрин идэлээх сойууһун рескомун көҕүлээһининэн тэриллибитэ.
Хор Арассыыйа уонна омук композитордарын классическай муусукаларын, байыаннай ырыалары, сахалыы уо.д.а. норуоттар ырыаларын уонна аныгы ырыалары толорор. Ол эрээри, ураты болҕомто духуобунай муусукаҕа ууруллар. Хор – «Ыллыыр Туймаада» куонкурус Гран-притын хаһаайына, үлэ кэлэктииптэрин бэстибээлин лауреата. «Ыллыыр Туймаада» лауреатынан хор эр дьоннорун састааба уонна «Орфей» ансаамбыл буолбуттара. Ырыа кэлэктиибэ сыл аайы «Көмүс куупаллар» бэстибээлгэ кыттар. Кинилэри куоракка ыытыллар араас кэнсиэртэргэ ыҥыраллар.
2014 сыл ыам ыйыттан М.Жирков аатынан муусука кэллиэһин, Дьокуускайдааҕы педагогическай кэллиэс уонна Дьокуускай куорат хордарын кытары Ырыа күнүгэр аналлаах Арассыыйа хордарын бэстибээлигэр кытталлар. Ону сэргэ сольнай ырыаларынан кэнсиэртэрэ Жатайга, Хатаска, Намҥа, Өктөмҥө ситиһиилээхтик ааспыттара. Манна Матвей Лыткин салайар Арыгыны хонтуруоллуур судаарыстыбаннай управлениета тэрийэр «Чөл олохтоох десант» дьаһалларын чэрчитинэн кыттыбыттара. Онон доруобуйа харыстабылын үлэһиттэрин хорун кэлэктиибэ чөл олоҕу өйүүргэ мэлдьи бэлэм.
2004 сылтан эмчиттэр хордарын Дьокуускайдааҕы муусука кэллиэһин преподавателэ, СӨ култууратын туйгуна Людмила Шумилова салайар. Хор концертмейстера – СӨ култууратын туйгуна, норуоттар икки ардыларынааҕы куонкурустар лауреаттара Светлана Вдовенко.
«Нэдиэлэҕэ иккитэ үлэбит кэнниттэн дьарыктанар буолбуппут сүүрбэттэн тахса сыл буолла. Биһиги бастакы хормейстербытынан Надежда Галецкая үлэлээбитэ. Кини туһунан сырдык өйдөбүл барыбыт сүрэхпитигэр тыыннаах», – диэн хор сүрүн кыттыылааҕа, спорт медицинатын үрдүк квалификациялаах бырааһа, терапевт-быраас, СӨ доруобуйа харыстабылын туйгуна Валентина Комиссарова кэпсиир.
«Хорга дьарыктаныыбыт дууһабытын угуттуур дьүүктэ уутун курдук буолла. Олохпутун уонна инники сайдыыбытын бу хора суох сатаан көрбөппүт. Ырыа киһини долгутар, уоскутар, үөрдэр, санаабытын көтөҕөр эрэ буолбакка, өссө киһи доруобуйатын бөҕөргөтөр. Хорунан ыллыырбытыгар толорор айымньыларбытын ис дууһабытынан ылыныыбыт күүһүрэр. Хормейстер уонна хор хас биирдии чилиэнин холбоһуктаах айымньылаах үлэлэрэ көстөр.
Дьэ, онтон үөрэппит ырыабытын көрөөччүлэргэ иһитиннэрэр долгутуулаах уонна үөрүүлээх түгэммит тиийэн кэлэр. Онно баар, көрөөччүлэр махталлара сүргэбитин көтөҕөрө. Итинник күүстээх махталы истээччилэр дууһаларын кылын таарыйдахпытына, иһийэн ылбыт саалаҕа «браво» хаһыы иһилиннэҕинэ билэбит. Кинилэр уҕараабат ытыстарын тыаһын кытары, ама, туох тэҥнэһиэй?», – дэһэллэр хор кыттыылаахтара.
Бу барыта биирдэ баар буолбатаҕа. Уочараттаах кэнсиэркэ диэри бэлэмнэниилэргэ сөптөөхтүк тыынарга, дорҕоону таһаарарга, тылы дьон өйүгэр-санаатыгар сатаан тириэрдэргэ уо.д.а. муусука араас кистэлэҥнэрин арыйарга төһөлөөх сыралара-сылбалара барара буолуой? Ону хор репертуара сылтан сыл аайы өссө интэриэһинэй буолан иһэрэ туоһулуур. Кэлэктиипкэ муусукаҕа сыһыаннаах, ураты куоластаах саҥаттан саҥа дьон кэлэн иһэрэ хор инникилээҕин кэрэһилиир.
Доруобуйаны ырыанан эмиэ эмтиир үрүҥ халааттаах аанньалларга сарсыҥҥы үбүлүөйдээх кэнсиэртэригэр элбэх махталлаах көрөөччүнү уонна ситиһиини баҕарыаҕыҥ!
Надежда ЕГОРОВА, «Саха сирэ» хаһыат, edersaas.ru