Сотору-сотору киһи өлүүлээх суол быһылааннара тахса туралларыттан киһи да ытырыктатар буолла. Бөлүүн түүн аны Горнай улууһугар икки киһи суорума суолланна.
Ол курдук, СӨ ИДьМ-тын ГИБДД пропагандаҕа отдела иһитиннэрбитинэн, балаҕан ыйын 25 күнэ үүнэр түүнүгэр Горнай улууһугар Бүлүүлүүр суолга «Toyota Succeed» 36 саастаах суоппара Дьокуускай куораттан айаннаан испит.
Олус түргэнник көтүтэн испит буолан, уруулун кыайан салайбакка, утары суолга тахсан, «Volvo» таһаҕас тиэйэр массыынаҕа тиийэн саайыллыбыт. «Тойотаҕа» суоппары таһынан 41 саастаах киһи олорсон испит. Бу дьон иккиэн быһылаан сиригэр өлөөхтөөбүттэр…
Таһаҕас тиэйэр массыына суоппара арыгы испэтэх. Үлэлээн баран, суол таһынааҕы кафеҕа аһыы айаннаан иһэн көрдөҕүнэ, киниэхэ утары «иномарка» массыына түргэн баҕайытык айаннаан иһэр эбит. Уҥа-хаҥас салайбахтаан баран, кини массыынатыгар ойоҕоһунан кэлэн түспүт.
Барыллаан быһаарыынан, бу самосвал суоппара массыына ыытар быраабын болдьоҕо ааспыт эбит, онон, киниэхэ административнай боротокуол толорбуттар.
Маны таһынан, бырааба суох үлэһити массыынаҕа олордубут салайааччыга туһулаан бэрэбиэркэ барар.
Госавтоинспекция санатар: суолга кутталлаах быһыы-майгы тахсыбатын туһугар төһө түргэнник айанныахтааххытын тутуһуҥ!
Хаартыскалар: СӨ ИДьМ-тын ГИБДД пропагандаҕа отдела.