Билиҥҥи дьалхааннаах үйэҕэ биир эйгэҕэ, буолаары буолан, биир тэрилтэҕэ уһун кэмҥэ үлэлии сылдьар дьон ахсааннара элбэҕэ суох диэтэхпинэ, алҕаһаабатым буолуо. «Якутскэнерго» ПАУо Энергосбытын Мирнэйдээҕи салаатын Бүлүүтээҕи учаастагын начаалынньыга Ливана Федорова үөрэҕи бүтэриэҕиттэн харыс да халбарыйбакка, биир тэрилтэҕэ үлэлии сылдьар.
edersaas.ru
Ливана Ивановна Энергосбыт Бүлүүтээҕи учаастагар 17 сыл анараа өттүгэр кэлбитэ. Дьокуускайдааҕы сибээс уонна энергетика колледжыгар үөрэнэ сылдьан олоҕун аргыһын көрсөн, үөрэхтэрин бүтэрээт, Бүлүүгэ көспүттэрэ.
Кини аҕата өр сылларга Кэбээйи улууһун нэһилиэгэр дизельнэй станцияҕа үлэлээн, кыысчаан кыра эрдэҕиттэн станцияҕа сылдьара. Онон оскуоланы бүтэрэригэр, энергетик идэтин баһылыахтаахпын диэн бэйэтигэр сыал-сорук туруоруммута.
– Энергосбыт үлэтигэр интэриэс Хотугулуу-Илиҥҥи электрическэй ситимнэргэ быраактыкалана сырыттахпына үөскээбитэ. Онно сылдьан электричество уотунан туһаныыны ааҕарга-суоттуурга үөрэнэн, бу эйгэни тута сөбүлээбитим. Төһө да анал үөрэхтээх буолларбын, бастаан үлэбин ыарырҕатар этим. Инженер-иниспиэктэрдээбитим. Салайааччыларым үөрэтэн-такайан, сыыйа уопутуран барбытым. Ол курдук, Акулина Калачикова, Лилия Васильева курдук бэтэрээн-энергетиктары кытары үлэлээбит дьоллоохпун, – диэн Ливана Ивановна үлэтин бастакы сылларын туһунан иһирэхтик ахтар.
Бүлүүтээҕи учаастак улуус 22 нэһилиэнньэлээх пуунун таһынан, өссө Кэбээйи түөрт сэлиэнньэтин көрөр-истэр эбээһинэстээх. Онон икки улууһунан үлэлиир сүрдээх улахан учаастак. Урукку сыллары кытары тэҥнээтэххэ, олорор дьиэ, тэрилтэ ахсаана лаппа элбээн, үлэлэрин ыыра кэҥээбитин бэлиэтиир. Бүлүү куорат да буоллар, үксэ чааһынай дьиэлэр.
Уопуттаах исписэлииһи, идэтийбит тэрийээччини 2009 сыллаахха учаастак начаалынньыгынан анаабыттара. Тэрилтэ 14 үлэһиттээх. Килийиэннэри кытары үлэлиир буоланнар, хас биирдии киһини кытары биир тылы буларга дьулуһаллар. Контролердар сайыҥҥы өҥүрүк куйааска, кыһыҥҥы тостор тымныыга ыаллары кэрийэн, электричество уотунан туһаныы көрдөрүүтүн ылаллар. Аны ханна да буоларын курдук, уот ситимнэригэр уоран холбонон олорооччулар эмиэ бааллар. Маннык түгэҥҥэ сэрэтии үлэтин ыыталлар. Уотунан туһаныы өҥө буоларынан сибээстээн, төлөбүр харчыта энергетическэй эбийиэктэри саҥардыыга, өрөмүөн үлэтигэр, эксплуатацияҕа ыытылларын хас биирдии киһи өйдүөхтээх.
Кэлэктиипкэ үлэни өрө туппут дьон үлэлииллэрэ хайҕаллаах. Ол курдук, быйыл биир иниспиэктэрдэрин Бүлүү куорат дьаһалтатыгар баһылык солбуйааччытынан үлэҕэ ыҥырбыттара. Онон, Ливана Ивановна хас биирдии үлэһитин өрө тутар, ытыктыыр.
«Үлэ – дьол» диэн мээнэҕэ эппэтэхтэрэ чахчы. Үлэтинэн, дьиэ кэргэнинэн дьоллооҕун эбэн этэр. Кэргэнэ эмиэ энергетик. Бүлүүтээҕи РЭС-кэ электромонтер. Үс уоллаахтар. Улаханнара номнуо устудьуон. Ортолоро улуустааҕы гимназия үөрэнээччитэ, кыралара быйыл үһүн туолбута.
«Сааскы, күһүҥҥү өттүгэр дьиэ кэргэнинэн айылҕаҕа тахсан сынньанарбытын сөбүлүүбүт. Тыа дьоно быһыытынан сайын бары оттуубут. Оттон Энергетик күнүн куруук уратытык ылабыт. Оҕолорбут энергетика курдук эппиэтинэстээх салааҕа үлэлии сылдьарбытынан киэн тутталлар», – диэн Ливана Ивановна кэпсиир.
Энергетиктэр өрөбүл, бырааһынньык күн диэн аахсыбакка түбүгүрэн, уустук уонна эппиэтинэстээх үлэҕэ туох баар күүстэрин-уохтарын биэрэн туран үлэлииллэр.
Ахсынньы 22 күнүгэр дойду үрдүнэн Энергетиктар күннэрэ бэлиэтэнэринэн сибээстээн, Энергосбыт Мирнэйдээҕи салаатын Бүлүүтээҕи учаастагын үлэһиттэрин идэтийбит бырааһынньыктарынан эҕэрдэлиибит!
Анивера АКИМОВА, «Саха сирэ» хаһыат, edersaas.ru