Уһук Илиҥҥи федеральнай уокурукка үөрэнээччилэр, устудьуоннар уонна үлэлиир исписэлиистэр ортолоругар Федерация Сэбиэтин чилиэнэ Вячеслав Штыров бирииһигэр үгэскэ кубулуйбут “Мин — инженербин” диэн куонкурус ыытыллар. edersaas.ru
Быйылгы куонкуруска «Идэтийбит инженер» хайысхаҕа «Якутскэнерго» исписэлииһэ Александр Иовлев кыайыылаах тахсан, “Лада-гранта” массыынанан наҕараадаламмыта. Эдэр үлэһит бырайыагын, идэтин, дьиэ кэргэнин туһунан кэпсиир:
— Мин Таатта улууһун Игидэй нэһилиэгиттэн төрүттээхпин. Онно тохсус кылааска диэри үөрэнэн бараммын, Ытык Күөлгэ оскуолабын бүтэрбитим. Таайым электрик идэлээх, кыра эрдэхпиттэн кини уот тардарын көрө улааппытым, испэр “мин эмиэ кини курдук буолуоҕум” диэн саныырым. Онон, эрдэттэн сыал-сорук туруорунан, П.И. Дудкин аатынан Дьокуускайдааҕы сибээс уонна энергетика колледжыгар үөрэнэ киирбитим. Үөрэхпин кыһыл дипломунан бүтэрэн, “Якутскэнерго” тэрилтэҕэ үлэлээбитим номнуо 11-с сылыгар барда. Манна маастарынан үлэлиибин.
— Куонкуруска кыттыбыт бырайыагыҥ, чахчы, олус наадалаах эбит.
— Бырайыагым аата «Внедрение автоматики защиты от однофазных замыканий на землю в сетях с изолированной нейтралью 6-35 кВ» диэн. Ол эбэтэр, судургутук быһаардахха маннык: биһиги хампаанньабыт бас билиитигэр сүүстэн тахса подстанция баар. Ол подстанциялар дьуһуурунай үлэһитэ суох тураллар. Арай онно саахал тахсар түгэнигэр, аһаҕас уоттаах линия сиргэ түһэр уонна нэһилиэктэн үлэһиттэр кэлэн оҥоруохтарыгар диэри оннук сытар. Ол кэмҥэ сылгы, ынах бөҕөтө линияны үктээн өлөр, баһаар барыан, оннооҕор, билбэккэ киһи уокка оҕустарыан сөп. Мин бырайыакпар, маннык саахал буоллаҕына, подстанция уота бүтүннүү арахсан, куттала суох буолан хааларын толкуйдаатым.
— Куонкурус туһунан санааларыҥ? Кыайыам дии санаабытыҥ дуо?
— “Мин – инженербин” куонкурус ыытыллара наадалаах уонна туһалаах дии саныыбын. Саҥаны толкуйдуурга, ону олоххо киллэрэргэ тирэх буолар. Сылын аайы ыытыллан, саҥаттан саҥа ааттар тахса турдуннар. Мин куонкуруска кыайыам диэн санабаатаҕым, барыта соһуччу буолбута.
— Саха сиригэр бырамыысыланнаска сахалар сыстыбаттар диэн өйдөбүл баар. Маны туох дии саныыгын?
— Бу өйдөбүл сүтэн эрэр дии саныыбын. Сахалар бу эйгэҕэ табыллан үлэлиибит. Бэйэм үлэлиир тэрилтэбинэн холобурдуубун, үксэ сахаларбыт. Монтер, маастар эрэ буолбакка, салайар дуоһунаска сахалар эмиэ бааллар.
— Бэйэҕэр массыыналааххын дуо? Бириискин туттуҥ дуо?
— Баар, массыыналаахпын, эргэ иномаркалаахпын. Бирииспин, “Лада-гранта” массыынабын гарааска туруордум. Сайыҥҥы эрэһиинэлээх көлүөһэлэрдээх, онон сайын сүүрдүөҕүм.
— Үлэ-хамнас табыллыытыгар дьиэ кэргэн улахан оруоллаах. Дьиэ кэргэниҥ туһунан кэпсээ.
— Айна диэн кэргэннээхпин, икки кыыс оҕолоохпут — 6 уонна 4 саастаахтар. Мин үлэм элбэх барыылаах-кэлиилээх, куруук командировкаҕа сылдьабын. Кэргэним оҕолорбутун кытта соҕотох хаалара элбэх. Ол эрээри, дьиэ кэргэним үлэбин олус өйдүүр, куруук күүс-көмө буолар. Дьиэбэр миигин өйдүүр, өйүүр дьоннооҕум олус үчүгэй.
— Кыайыыгын кимиэхэ аныыгын?
— Кыайыыбын ийэбэр Татьяна Ивановна Иовлеваҕа, кэргэммэр, оҕолорбор аныыбын. Бырайыакпын оҥорорбор сүбэ-ама биэрбит, санаабын олоххо киллэрэрбэр күүс-көмө буолбут Александр Афанасьевич Захаровка, Герман Николаевич Даниловка, Сергей Владимирович Павловка махталбын тиэрдэбин.
Айтана АММОСОВА, «Саха сирэ» хаһыат, edersaas.ru