Энергосбыт контакт-киинин үлэһитэ Марина Парникова Дьокуускай куорат 385 сылыгар анаммыт хаартыскаҕа түһэрии куонкуруһун «Дьокуускай куорат фотоисторията» диэн хайысхатыгар бочуоттаах үһүс миэстэни ылла.
Марина Парникова үлэтэ икки үйэни ситимниир. Ол курдук, фотограф «Киин» киинэ тыйаатырын биэс уон сыл анараа өттүнээҕи уонна билиҥҥи кэминээҕи тас көстүүтүн олус табыгастаахтык тэҥҥэ дьүөрэлээн көрдөрдө. Бу «аптаах» хаартыскаҕа урукку уонна аныгы кэм чахчылара силбэһэллэр, бэйэ-бэйэлэрин ситэрсэн биэрэллэр. Икки кэм, икки история. Кинилэри тыргыллар уһун уулусса, олох суола ситимниир. Киһини долгутар, толкуйдатар, сэргэхситэр баай ис хоһоонноох үлэ дьүүллүүр cүбэ биһирэбилин ылыан ылла.
«Дьокуускай куорат олохтоохтор харахтарынан» диэн куонкурус үтүө үгэс быһыытынан быйыл алтыс төгүлүн ыытылынна. Бастыҥтан бастыҥнары үбүлүөйдээх тэрээһин чэрчитинэн чиэстээтилэр. Кэрэни кэрэхсиир, үтүөнү үксэтэр талааннаах дьоҥҥо диплом туттардылар.
Саргылана Савватеева, Дьокуускай.