Энергосбыт үлэһиттэрэ тэлгэһэни куруук ыраастык тутар үтүө үгэстээхтэр. Быйыл тэрилтэ иннигэр баар сквергэ алта тыһыынчаттан тахса араас сибэккини олордубуттара сүргэни көтөҕөр, харахха тута быраҕыллар.
Манна үлэһиттэр да, куорат олохтоохторо да күнүс эбиэт кэмигэр, киэһэ үлэ кэнниттэн тахсан сөрүүкүүллэр, сынньаналлар. Ону таһынан чугастааҕы уһуйаан оҕолоро кэлэллэр.
От күөх өҥ киһи хараҕын манньытар, өйү-санааны сааһылыырга көмөлөһөр дииллэр. Күөх хонууга сынньаныахха, спордунан дьарыктаныахха уонна үөрүүлээх түгэннэри бэлиэтиэххэ сөп. Быйыл манна өссө үлэһиттэр бэлисипиэттэрин уурар сирдэрин оҥорбуттар.
Күн аайы сквергэ төрөппүттэр оҕолорун кытта дуоһуйа күүлэйдииллэр. Кырачааннар манна үөрэ-көтө оонньууллар. Куорат биир кэрэ көстүүлээх скверигэр кэлэн хаартыскаҕа түһэллэр, селфилииллэр.
Манна даҕатан эттэххэ, Энергосбыт тупсаҕай скверэ куорат уонна уокурук куонкурустарыгар куруук миэстэлэһэр. Бу сырдык санаа, кэрэни, үчүгэйи тарҕатыы мэктиэтэ.
«Якутскэнерго» ПАУо Энергосбытын пресс-сулууспата