Ил Дархан э.т. Айсен Николаев «ЭПЛ Даймонд» алмааһы кырыылыыр хампаанньаны тэрийбит Петр Федоровы кытта көрсөн өрөспүүбүлүкэ ювелирнай салаатын инники былаанын туһунан кэпсэттилэр. Петр Федоров аан дойду уонна Арассыыйа ырыынагар үрдүк күрэстэһии уустук балаһыанньаны үөскэппитин бэлиэтээтэ.
edersaas.ru
Ол да буоллар, «ЭПЛ Даймонд» Дьокуускайга уонна Москваҕа бирилийээн киэргэллэри оҥорон таһаарыытын улаатыннаран иһэр. Арассыыйа үрдүнэн уонна омук сиригэр саҥа атыы-эргиэн салааларын арыйар. Биир оннук улахан ситиһии быһыытынан, Эмиэрикэ үптээх-харчылаах баай дьоно, Голливуд сулустара сөбүлээн мустар, сынньанар сирдэригэр Майамига ювелирнай салон арыйда.
Айсен Николаев Эмиэрикэ бриллиантовай ырыынагар саха хампаанньата бигэтик үктээн киирбитинэн эҕэрдэтин тириэртэ. Петр Федоров бизнеһи сайыннарарга эрэгийиэҥҥэ табыгастаах усулуобуйа тэриллэригэр баҕа санаатын эттэ. Ордук чуолаан, судаарыстыба уонна судаарыстыбаннай хампаанньалар чааһынай хапытаалга тэҥэ суох балаһыанньаны үөскэтэн, күрэстэһэр ырыынакка бизнеһинэн дьарыктаныа суохтаахтарын санатта. Бу туһунан РФ бэрэсидьиэнин «Күрэстэһиини сайыннарарга судаарыстыбаннай бэлиитикэ сүрүн хайысхата» диэн ыйааҕар сурулла сылдьарын бэлиэтээтэ.
Марианна Тыртыкова, «Саха сирэ», edersaas.ru