Погуоннаах кыргыттары харыстыаҕыҥ!

Бөлөххө киир:

Погуоннаах, ол эбэтэр байыаннай пуормалаах кыргыттары көрөн, кинилэр тутта-хапта сылдьалларын, дуоспуруннаах саҥаларын истэн киһи ымсыырар. Мин санаабар, оскуолаҕа үөрэнэ сылдьан элбэх кыыс милиция, полиция буолуон баҕарар ыра санаалааҕа буолуо. Ол эрэн, онтон тулуурдааҕа, олоххо сыалын ситиһэр, кытаанах майгылааҕа бу эйгэҕэ тиийэн кэлэрин бу кэккэлэһэ турар кыргыттар кэпсииллэр.

edersaas.ru

Сунтаардааҕы Ис дьыала салаатыгар эр бэртэри кытта, 18 кэрэ аҥаар араас эйгэҕэ үлэлиир. Ким эрэ дознаватель, ПДН иниспиэктэрэ, холуобунай ирдэбил опер-боломуочунайа, ГИБДД иниспиэктэрэ уо.д.а.

Ис дьыала салаатын уопсастыбаннай сүбэтэ полиция үлэтин-хамнаһын көрөн-истэн, кинилэргэ сүбэ-соргу буолар уонна кинилэри нэһилиэнньэ дьонун кытта ситимниир. Сэбиэт бэрэссэдээтэлинэн сокуоннай саастарын ситэ илик оҕолор «Кэскил» кииннэрин салайааччыта Альбина Прокопьева үлэлиир. Уопсастыбаннай сүбэ бу сырыыга погуоннаах кэрэ аҥаардарга болҕомто ууран, “Махтанабыт, Эһиэхэ!” диэн тэрээһини ыытан,  ыарахан үлэлээх кыргыттарбытыгар үтүө, дьоро күнү бэлэх уунна.

Тэрээһин саҕаланыытыгар Сэбиэт чилиэннэрэ: Лилия Васильева, Татьяна Иванова, Степан Тихонов, Максим Оконешников, Евгений Данилов, Олег Попов, Мария Кобельянова түмсэннэр, кинилэр үлэлэригэр махтанан, кэрэ сибэкки дьөрбөтүн уонна минньигэс бэлэхтэри туттартаатылар. Дьоро киэһэни Сунтаар сулустара Афанасий Никифоров, Людмила Пустолякова киэргэттилэр уонна Сэбиэт кыргыттара «Ыал ийэтинэн», «Бэйэни таптааһын – ситиһии төрдө», «Ыарахантан хайдах сынньаныахха» диэн тиэмэлээх аһаҕас кэпсэтиилэри уонна сүбэлэри биэрдилэр. «Кэскил» киин үлэһиттэрин уонна Сэбиэт көмөтүнэн тэриллибит сандалыга итии чэй иһэ-иһэ арааһы кэпсэттибит, Сунтаар олоҕо тупсарыгар арааһы тобуллубут, дьахтар анала туохханый, хайдах бу эйгэҕэ кэлбиттэрин, туох ситиһиилээхтэрин сэһэргэстибит уонна погуоннаах кыргыттар күлэ-үөрэ олороллоруттан манньыйдыбыт.

Кыргыттар, махтал эһиэхэ дьалхааннаах олох сүүрүгэр сөптөөх суолу батыһарга сирдииргитигэр уонна күннээҕи түбүктээх үлэҕэ хараҥаны самнаран сырдык туһугар охсуһаргытыгар!

Погуоннаах кыргыттар кэрэ аҥаардар, күн күбэй ийэлэр буолалларын умнумуоҕуҥ, харыстабыллаахтык сыһыаннаһыаҕыҥ!

Мария КОБЕЛЬЯНОВА — ТУСКУЛААНА, edersaas.ru сайтка анаан

+1
0
+1
0
+1
0
+1
0
+1
0
+1
0
+1
0