Кэнники сылларга самаан сайыны көрсөр ыһыахтарбытыгар уонна араас тэрээһиннэргэ кэрэ аҥаардар эрэ буолбакка, эр дьоннор сахалыы таҥаһы кэтэ сылдьалларын элбэхтик көрөҕүн. Олус үчүгэй көстүү.
edersaas.ru
Эр киһи ыһыахха кэтэр таҥаһа, сүрүннээн, сахалыы саҕалаах, уһун сиэхтээх уонна араас атрибуттардаах, түүлээх киллэһиктээх чэпчэки сонтон турар. Иһинэн сиитэс, солко эбэтэр атылаас таҥастан тигиллибит ырбаахы кэтэллэр. Сорохтор сайыҥҥы сонноругар ханыы төбөҕө кэтэри сакаастыыллар. Кэнники сылларга кылтан тигиллибит сэлээппэлэри кэтэллэр. Саха эр киһитин сиэринэн уонна айылҕа оҕото буолалларын кэрэһилээн, хайаан да сылгы сиэлиттэн оҥоһуллубут дэйбиирдэнэллэр.
Кэрэхсэбиллээҕэ диэн, сахалыы таҥаһы эр дьоннор тигэр буоллулар. Холобур, Хаҥалас улууһугар модельер Петр Яковлев, Уус Алдан улууһугар Иван Окоемов ситиһиилээхтик үлэлии сылдьаллар. Оттон бу хаартыскаҕа Николай Никитин үлэлэрин көрөҕүт. Кини үлэлэрэ соторутааҕыта Чурапчы улууһун ыһыаҕар эр киһи сахалыы таҥаһыгар бастакы миэстэни ыллылар.
Надежда ЕГОРОВА, «Саха сирэ» хаһыат, edersaas.ru
Светлана ПЕТРОВА түһэриитэ