«Эрэн миэхэ» – «Туймаада» уолаттарын истиҥ бэлэҕэ

Бөлөххө киир:

Кулун тутар 6 күнүгэр С.Омоллоон аатынан Опера уонна балет тыйаатырыгар «Туймаада» ырыа судаарыстыбаннай ансаамбыл эр дьоно «Эрэн миэхэ…» кэнсиэрин кэрэ аҥаардарга бэлэх уунна.

Надежда ЕГОРОВА, «Саха сирэ» хаһыат, edersaas.ru 


Бу күн уолаттар ийэҕэ, кэрэ куоларга анаммыт ылбаҕай ырыаларын ис дууһаларыттан толордулар.

Саалаҕа олорор төрөөбүт күннээхтэргэ, кэлэктииптэрин кэрэ аҥаардарыгар уонна, биллэн турар, махталлаах салайааччыларыгар Светлана Ивановаҕа сибэкки эгэлгэтин бэлэхтээтилэр.

Уолаттар кэнсиэр хас да түһүмэҕэр «Хотугу ийэкээм», «Сааскы күҥҥэ», «Березы», «Очи черные», «Я вас любил», «Киэһээҥи Бүлүү», «Мин айаас атым», «Биһи баарбыт сахалар», «Эрэн миэхэ» уо.д.а. ырыаларын хаһааҥҥытааҕар да өрө көтөҕүллэн туран ыллаатылар.

Көрөөччүлэр уолаттар биирдиилээн ырыаларын дохсун ытыс тыаһынан көрүстүлэр. Андрей Тарабукин «Хаалларыма», Андрей Шадрин «Кэрэ кыыс», «Милая мама», Илья Николаев «Натали», Николай Роббек «Ты на свете есть», Илья Николаев «Туйаарыма Куо», Гаврил Васильев «Кыргыттарыам» ырыаларын толордулар.

Манна даҕатан эттэххэ, «Туймаада» ансаамбыл ырыалара сырыы аайы атыннык,  уратытык иһиллэллэр. Тоҕо диэтэххэ, салайааччы Светлана Павловна  ырыалар музыкаларыгар туох эрэ саҥаны киллэрэр, көннөрөр, чочуйар. Бу да сырыыга  «Скажите девушки», «Необыкновенная», «Мин айаас атым» уо.д.а.  ырыаларга эбии үлэ барбытын болҕомтолоох истээччилэр сэргии ылыннылар. Уолаттар репертуардарыгар киллэриллэ сылдьар попурриларын эмиэ дохсун ытыс тыаһынан ылыннылар.

Кэнсиэри «Туймаада» ансаамбыл үлэһитэ, ырыаһыт, продюсер Мария Соболева ыытта.

Ансаамбыл бырааһынньыктааҕы кэнсиэрин бырагырааматынан ыраах Үөһээ Халыма улууһугар айаннаата. Үөһээ Халыма улууһун көрөөччүлэрэ тапталлаах артыыстарын тыыннаах куоластарын истээри долгуйа күүтэллэр.

30 сыллаах үбүлүөй

Ансаамбыл быйыл тэриллибитэ 30 сылын бэлиэтиир сылыгар бырагыраамата киэҥ, былаана элбэх. Ол курдук, 2017 сыллааҕы үлэлэрэ ансаамбыл тэриллиэҕиттэн үлэлии, айа-тута сылдьар СӨ үтүөлээх артыыската Лина Акимова Саха тыйаатырыгар «Ырыа – санаам кыната» диэн айар киэһэтинэн саҕаламмыта.

Муус устарга биир идэлээхтэрэ Андрей Тарабукин олоҕор соһуччу суоһаабыт алдьархай содулун туоратыыга көмөлөһөргө анаммыт анал кэнсиэри тэрийиэхтэрэ. Эмиэ бу ыйга, иккис дьиэлэрин кэриэтэ буолбут камернай саалаларыгар, СӨ үтүөлээх артыыската, ураты куоластаах ырыаһыт Аида Иванова талааныгар сүгүрүйээччилэр мустуохтара. Үгэс курдук, бэлиэ күннээх киһи дойдутугар, бу сырыыга Аида төрөөбүт-үөскээбит Мэҥэ Хаҥалаһыгар ыалдьыттыахтара.

«Туймаада» судаарыстыбаннай ансаамбыл өрөспүүбүлүкэҕэ эрэ буолбакка, Арассыыйаҕа, омук сирдэригэр биллибиттэрэ, талааннарын көрдөрбүттэрэ 30 сылыгар ананар улахан кэнсиэрин Опера уонна балет тыйаатырыгар алтынньыга-сэтинньигэ былаанныыр.

Кинилэр кэнсиэртэри таһынан аудио, видеоальбомнары, компакт-диискэлэри таһаараннар, көрөөччүлэрин үөрдүөхтэрэ. «Туймаадалары» куруук кэтэһэр илин эҥээр, киин улуустарга гостуруолга айанныахтара.

Надежда ЕГОРОВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0