Олох сотору кэминэн – олунньу 24-25 күннэригэр сахалыы ырыаны, музыканы таптааччылары аны “Этигэн хомус” куонкурус бииргэ түмүөҕэ.
Татьяна Маркова, «Саха сирэ» хаһыат, https://edersaas.ru/
“Сахалыы Виктория” радиостанция уонна Дьокуускай куорат Култуураҕа, духуобунай сайдыыга управлениета бу ырыа күрэҕин быйыл хайыы-үйэҕэ 17-с төгүлүн ыыталлар.
Соторутааҕыта буолан ааспыт пресс-конференцияҕа “Виктория” радиостанция генеральнай дириэктэрэ Александр Глотов, дьүүллүүр сүбэ бэрэссэдээтэлэ, саха норуодунай артыыһа Алексей Егоров, “Сахалыы Виктория” кылаабынай эрэдээктэрэ Анна Исакова, о.д.а. күрэхтэһиигэ бэлэмнэнии хайдах баран иһэрин кэпсээтилэр.
“Саха сирэ” хаһыат ааспыт, олунньу 8 күнүнээҕи нүөмэригэр итиэннэ “Эдэр саас” сахалыы сайтка номинаннар ааттара толору тахсыбыта, онон ааҕааччылар билэн олороҕут. Кыайыылаахтар истээччилэр куоластарынан уонна ырыа араадьыйаҕа рейтининэн быһаарыллыахтара.
Тэрийээччилэр, быйыл элбэх саҥа аат баарын итиэннэ, “Ураты сүүрээн” бэһис номинацияҕа чахчы ураты интэриэһинэй толорооччулар киирбиттэрин үөрэ бэлиэтииллэр. Ол курдук, Эбээн-Бытантайтан Михаил Умановы, Москваттан Зарина Копыринаны, о.д.а. күүтэбит.
Оттон “Саха ырыатын сайыннарыыга ураты кылаатын иһин” анал бириэмийэ быйыл эмиэ, үгэс быһыытынан, туттарыллыа диэтилэр (бастакы лауреатынан Эдьиий Марыына буолбута), ол гынан баран, аатын бакаа кистииллэр.
Режиссер аата эмиэ сэкириэккэ тутуллар. Чуолаан режиссер “Көрөөччүлэр биһирэбиллэрэ” бириис кыайыылааҕын хайдах быһаарары бэрт интэриэһинэйдик, уратытык толкуйдаабыт үһү. Дьэ ону, кэнсиэргэ кэллэххитинэ бэйэҕит көрүөххүт.
Билиэт сыаната кэккэ сылларга уларыйбакка турарын Александр Глотов киэн тутта бэлиэтиир. Ол курдук, 1500 -2500 солк. сыаналаах билиэт билигин Опера уонна балет тыйаатырын кассатыгар итиэннэ “Виктория” рекламнай агентствоҕа (Ленин пр. 14, офис 15) атыылана турар.
Биллэрин курдук, “Этигэн хомуска” бэһис төгүлүн кыайбыт ырыаһыт наҕараадатын “Кыһыл көмүс Этигэн хомуһу” тутар, кини куонкуруска салгыы кыттыбат. “Кыһыл көмүстэр” үгүстэрэ дьүүллүүр сүбэҕэ үлэлииллэр. Оннук чаҕылхай талааннарынан биһиэхэ буолаллар Павел Семенов, Сахаайа, Далаана, Лэгэнтэй уонна Ника.
Бу дьиҥнээх, тыыннаах куолаһынан барар куонкурус туһунан суруналыыстар үчүгэйдик, дэлэйдик суруйуҥ, кэпсээҥ диэтилэр. Оттон куонкурус сүрүн спонсора, “Японец” автокиин салайааччыта Афанасий Алексеев, “Этигэн хомус” музыкальнай күрэҕи “Саха” НКИХ эмиэ киэҥник сырдатара буоллар, диэн баҕа санаатын тиэртэ.
Татьяна Маркова,»Саха сирэ» хаһыат, https://edersaas.ru/