Бырабыыталыстыба бэрэссэдээтэлэ Евгений Чекин Сааскылаахха ыытар мунньаҕар Анаабыр национальнай (долган-эбэҥки) улууһун социальнай-экономическай сайдыытын боппуруоһа көрүллүөҕэ.
Бэҕэһээ Евгений Чекин бырабыыталыстыба оробуочай бөлөҕүн кытары «Тугутчаан» уһуйаан саҥа дьиэтин аһыллыытыгар, Николай Андросов аатынан тэрилтэ астыыр сыаҕар итиэннэ нэһилиэнньэни олох-дьаһах өҥөтүнэн хааччыйар кииҥҥэ, тутулла турар аҕыс кыбартыыралаах дьиэ тутуутугар сырытта. Сүүс миэстэлээх, толору хааччыллыылаах «Тугутчаан» уһуйаан саҥа куорпуһа судаарыстыба үбүнэн уонна бүддьүөтү таһынан харчы көмөтүнэн тутуллан үлэҕэ киллэриллибит. “Маннык ньыманан өрөспүүбүлүкэҕэ 17 уһуйаан дьиэтэ тутуллуохтаах. Оҕолор биһиги кэскилбит буолаллар, ол иһин, сыллата саҥаттан саҥа уһуйааннары, оскуолалары, спорт уонна култуура эбийиэктэрин тутабыт”, — диэтэ Евгений Чекин нэһилиэнньэни кытары көрсүһүүгэ.
Бырабыыталыстыба бөлөҕө бэҕэһээ улуус дьаһалтатыгар мунньахтаабыта, нэһилиэнньэни кытары көрсүбүтэ. Бүгүн Үрүҥ Хайа бөһүөлэгэр үлэ икки хайысханан ыытыллыаҕа. Евгений Чекин салайар бөлөҕө Илья Спиридонов аатынан МУТ ыстаадатыгар сылдьан, табаһыттар үлэлэрин-хамнастарын билсиэҕэ. Иккис бөлөх эбийиэктэринэн кыстыкка бэлэмниини, хочуолунайдар туруктарын билсиэҕэ, «Анаабыр алмаастара» АУо Эбэлээхтээҕи учаастагар сылдьыа.
Сааскылаахха ыытыллар бырабыыталыстыба мунньаҕар Анаабыр национальнай (долган-эбэҥки) улууһун социальнай-экономическай сайдыытын туһунан сүрүн дакылааты улуус баһылыга Иван Семенов оҥоруоҕа, экономика миниистирин солбуйааччы Александра Пахомова өрөспүүбүлүкэ 2030 сылга диэри сайдыытын стратегиятыгар Анаабыр улууһун оруолун туһунан иһитиннэриэҕэ. Маны таһынан, олохтоох оҥорон таһаарыы боппуруостара дьүүллэһиллиэхтэрэ.
Раиса Сибирякова, “Саха сирэ” хаһыат, edersaas.ru.