Бырабыыталыстыба бэрэссэдээтэлэ Евгений Чекин бэс ыйын 9 күнүгэр Биэдэмистибэлэр икки ардыларынааҕы сыана хамыыһыйатын сүбэ мунньаҕын салайан ыытта.
edersaas.ru
Саха өрөспүүбүлүкэтин Сыана бэлиитикэтигэр судаарыстыбаннай кэмитиэтин бэрэссэдээтэлэ Антонина Винокурова от ыйын 1 күнүттэн хомунаалынай өҥө иһин төлөбүр ортотунан 6 % уларыйарын иһитиннэрдэ. Биллэрин курдук, тарыыптар дьэҥкэ буолалларын туһугар, 2016 сылтан бу боломуочуйа поселениелар таһымнарыгар бэриллибитэ. Ол эрээри, нэһилиэнньэлээх пууннарга үксүлэригэр тарыыптарга ааҕыллыбыт ороскуоттар дьиҥ баар балаһыанньаҕа сөп түбэспэттэр. Холобур, итиинэн хааччыйыы схематын, хочуолунайдар ахсааннарын, оттук-уматык көрүҥнэрин уо.д.а. уларыйыылара кэккэ өҥөлөр сыаналарыгар көрдөрүллүбэттэр. Винокурова этэринэн, хас биирдии нэһилиэнньэлээх пууҥҥа эбийиэктэри уонна хомунаалынай хаһаайыстыба ороскуоттарын сиһилии инвентаризациялааһын өрөспүүбүлүкэҕэ 1 млрд. 200 мөл. солк кэмчилиир кыаҕы биэриэҕэ.
Евгений Чекин улуустар баһылыктара тарыыбы аччатыыга интэриэстэрэ суох буолан, кэккэ мөккүөрдэр үөскүөхтэрин сөбүн бэлиэтээтэ. Итинэн сибээстээн Сыана бэлиитикэтигэр судаарыстыбаннай кэмитиэт иһинэн бу боппуруостарынан дьарыктанар судаарыстыбаннай хаһыанай тэрилтэни тэрийэргэ быһаарыы ылылынна. Биэдэмистибэлэр икки ардыларынааҕы сыана хамыыһыйатын чилиэннэрэ салгыы 2018 сыл от ыйын 1 күнүттэн нэһилиэнньэҕэ хомунаалынай өҥө төлөбүрүгэр чэпчэтиилээх тарыыптары олохтуур боппуруоһу итиэннэ «Сахатранснефтегаз» АУо хааччыйар айылҕа гааһын сыанатын көрдүлэр.
Раиса Сибирякова, “Саха сирэ» edersaas.ru