Евгений Чекин Уус Маайаҕа сырытта

Ааптар: 
Бөлөххө киир:

Бырабыыталыстыба Бэрэссэдээтэлэ Евгений Чекин бэҕэһээ Уус Маайа улууһугар үлэлээтэ.

edersaas.ru


Премьер-миниистир социальнай эбийиэктэри көрүүнү улуустааҕы киин балыыһаттан саҕалаата. Кылаабынай быраас этэринэн, балыыһа дьиэтэ өрөмүөнү эрэйэр, сыбаайатын хонуутун уонна эркиннэрин бөҕөргөтөр наада буолбут. Евгений Чекин бастаан экспертиза оҥорор наадатын, ол эрэ кэнниттэн быһаарыыны ылыахха сөбүн эттэ, архитектура уонна тутуу комплексын миниистирэ Вера Кузаковаҕа, доруобуйа харыстабылын солбуйааччы миниистирэ Олег Припузовка бу эбийиэги хонтуруолга ылалларыгар сорудахтаата.

Хаарбах дьиэттэн дьону көһөрүү бырагырааматынан Уус Маайа бөһүөлэгэр элбэх кыбартыыралаах түөрт дьиэ аны күһүн үлэҕэ киллэриллэрдии тутуллаллар. Премьер-миниистир улуус дьаһалтатыгар дьиэлэр олорорго чахчы тупсаҕай, сылаас буолалларын туһугар хаачыстыбаҕа болҕомтону уурарга эттэ. Үс этээстээх, 400 үөрэнээччигэ анаммыт оскуола дьиэтин тутуута график быһыытынан баран иһэрин бэлиэтээтэ.

«Уһук Илин уонна Байкал регионун социальнай-экономическай сайдыытын» федеральнай бырагырааматыгар Уус Маайа улууһа маһы таҥастыыр промышленность тэриллэр территориятын быһыытынан киллэриллэн турар эрээри, суол-иис суоҕа үлэни-хамнаһы тэрийэри атахтыыр эбит. Ити иһин улуус социальнай-экономическай сайдыытын боппуруостарыгар анаммыт мунньахха улуус баһылыга Юрий Боярскай киини кытары ситимниир, улууһу аһынан-таҥаһынан уо.д.а. хааччыллыытыгар тыын суолталаах «Амма» массыына суолун тутууну суһалсытарга, эргэрбит муосталары саҥардарга туруоруста. Маны таһынан ОДьКХ эйгэтигэр элбэх этиини оҥордо, ууну ыраастыыр тэриллэри, ититэр ситимнэри саҥардыы, хочуолунайдар кыамталарын улаатыннарыы, Уус-Миилгэ уонна Звездочкаҕа саҥа хочуолунайдары туруоруу  наадатын эттэ.

Этиилэргит бырабыыталыстыбаҕа көрүллүөхтэрэ, тустаах министиэристибэлэргэ сорудахтар тиэрдиллиэхтэрэ, – диэтэ мунньаҕы түмүктүүрүгэр Евгений Чекин. Итиэннэ олохтоох салайыы уорганнарыгар нэһилиэнньэни кытары үлэҕэ болҕомтону уурарга сүбэлээтэ, нэһилиэги уонна улууһу сайыннарыыга эппиэтинэс судаарыстыбаттан, салалтаттан буолбакка, олохтоох дьонтон саҕаланарын санатта. Биһиги уопсастыбаннас айар-тутар, үлэлиир-хамсыыр кыаҕын толору туһанар усулуобуйатын тэрийиэхтээхпит диэтэ.

Раиса СИБИРЯКОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0