Дьиэҕэ сылааһы хааччыйыы иһин төлөбүр прибор көрдөрүүтүгэр олоҕуруохтаах.
Бырабыыталыстыба баһылыга Евгений Чекин 2016 сыл балаҕан ыйын 26 күнүгэр ылыллыбыт 337 №-дээх “Саха Өрөспүүбүлүкэтигэр сылытыы иһин хомунаалынай өҥө төлөбүрүн туһунан” уураахха уларытыылары киллэриигэ сыһыаннаан, бу сарсыарда ОДьКХ уонна энергетика миниистирэ Гаврил Левины итиэннэ «Жатай» куораттааҕы уокурук дьаһалтатын баһылыга Анатолий Кистеневы кытары көрүстэ.
Анатолий Кистенев кэпсээбитинэн, Жатай бөһүөлэгэр 2014 сыл кулун тутартан саҕалаан нэһилиэнньэ сылааһы, итии-тымныы ууну, уоту туһаныытын төлөбүрэ дьиэҕэ туруоруллубут уопсай учуоттуур прибор көрдөрүүтүнэн оҥоһуллар буолбут. Онуоха эрдэттэн бэлэмнээн, олохтоох дьаһалта, салайар хампаанньа, хааччыйар тэрилтэлэр сылаас иһин төлөбүр кыһыҥҥы өттүгэр үрдүүрүн, сайынын намтыырын быһааран нэһилиэнньэҕэ өйдөтөр үлэни ыыппыттар.
Былырыын күһүн тахсыбыт “Саха Өрөспүүбүлүкэтигэр сылытыы иһин хомунаалынай өҥө төлөбүрүн туһунан” бырабыыталыстыба уурааҕар сылытыыга хомунаалынай төлөбүр тэҥ кээмэйинэн халаандаарынай сыл устата оҥоһуллар бэрээдэгэ олохтоммута. Анатолий Кистенев хомунаалынай өҥөнү дьиҥ баарынан (прибор көрдөрүүтүнэн) төлүүр быдан тупсаҕайын холобурдаан, ити уураахха уларытыы киллэрэр наадатын эттэ. Гаврил Левин бырабыыталыстыба уурааҕа нэһилиэнньэ бары араҥатын интэриэһин учуоттаан ылыллыбытын быһаарда, ол эрээри, жатайдар этиилэрин сиэрдээҕинэн аахта.
Евгений Чекин:
— Хайата да буолбутун иннигэр, нуормаламмыт ороскуоттартан тэйиллиэхтээх, нэһилиэнньэ ресурсалары чахчы төһөнү туһаммытынан төлүөхтээх. Онон, уураахха уларытыыны киллэриэххэ сөп.
Бырабыыталыстыба баһылыга көрсүһүүнү түмүктүүрүгэр, тустаах биэдэмистибэҕэ бу үлэни уталыппакка оҥорорго сорудахтаата.
Раиса СИБИРЯКОВА, “Саха сирэ” хаһыат, edersaas.ru