close
podpiska

Өймөкөөн Сэмэнин хаартысканан дьүһүйүүтэ батсаабы толордо...
Олох-дьаһах

Өймөкөөн Сэмэнин хаартысканан дьүһүйүүтэ батсаабы толордо

Бүгүн аан дойдутааҕы худуоһунньук күнүгэр Өймөкөөн улууһунааҕы култуура отделын методиһа, Тымныы кыһын Хаһаайынын Чысхаан брендин сайдыытыгар үлэлэһэр худуоһунньук идэлээх Семен Сивцев-Өймөкөөн Сэмэнэ Үргэл галереяҕа бэйэтин хаартыскаларынан анал быыстапкатын арыйда.

edersaas.ru

Семен Сивцев-Өймөкөөн Сэмэнэ кыһыннары-сайыннары тоҥмот уулаах дьүүктэни, хаар кыырпаҕын, айылҕа кэрэ көстүүтүн хоһуйуута худуоһунньук хараҕынан кыраҕытык уһуллар буолан, олох ураты көстүүлээх, ис хоһоонноох. Өймөкөөн Сэмэнэ Тымныы чыпчаалын символын – Тымныы оҕуһу худуоһунньук быһыытынан өссө 90-с сыллар саҥаларыгар ойуулаабытын, биир дойдулаахтара пааматынньык оҥорторбуттара уонна Тымныы полюһугар Өймөкөөҥҥө туруорбуттара. Бу Тымныы символа билигин аан дойдуга биллэр биир улахан пааматынньыгынан буолар. Тымныы оҕуһа – интернеккэ Өймөкөөн улууһун эрэ буолбакка, бүтүн Саха сирин визитнэй карточката да диэтэхпитинэ сыыспаппыт буолуо.

Семен Сивцев-Өймөкөөн Сэмэнэ айылҕа түөрт кэмин уратытык хоһуйар маастар. Кини,  ханна да сырыттар, өрүү фотоаппаратын туппутан сылдьар айар куттаах киһи. Холобура, бу дьон интэриэһин тарпыт кэрэ хартыынаны Өймөкөөн Сэмэнэ Уолчаан дабаанын сиһигэр трассанан айаннаан иһэн, массыына тохтобулугар түһэрбит.

Индигиир Эбэ бэйэтэ чочуйан оҥорбут муус чопчуларын көстүүтэ – эмиэ киһини абылыыр күүстээх хартыына!

Семен Сивцев-Өймөкөөн Сэмэнэ бу үлэлэрин соторутааҕыта Дьокуускай куоракка буолан ааспыт  “Кыһын Саха сириттэн саҕаланар” кыһыҥҥы туризм бэстибээлигэр «Хрустальные мелодии Оймяконья» диэн быыстапката бу тэрээһин киэргэлинэн буолбута. Кини хаартысканан дьүһүйүүлэрин көрбүт дьон, суотабайдарыгар түһэрэн ылбыттара. Ол күн социальнай ситимнэргэ Семен Сивцев-Өймөкөөн Сэмэнин хаартыскалара тарҕаммыттара аҕай.

Социологическай наука доктора Ульяна Винокурова Чысхаан брендин бүтүн аан дойдуга тарҕатааччы айар үлэтин туһунан бу курдук санаатын үллэһиннэ:

Семен Сивцев-Өймөкөөн Сэмэнэ төрөөбүт дойдутун кэрэ айылҕатын ураннык хоһуйар патриот киһи. Тымныытынан аатырар Өймөкөөн айылҕаттан айдарыылаах ыччата ис туругуттан айар алгыстаах дьүһүйүүлэрэ кини айар үлэтин сэргиир киһиэхэ ураты дириҥник иҥэллэр. 

Сэмэн биир дойдулаахтарын, «Дабаан» айар түмсүү чилиэннэрин аатыттан Тамара Винокурова табаарыстарын  бастакы айар быыстапкатынан эҕэрдэлээтэ. Табаарыстарын бэлэҕин, «Көмүлүөк» фирма иһитин сертификатын ылан, кини үлэтин сыанабылын быһыытынан ылынан, худуоһунньук дууһатыгар өр тута сылдьара чахчы.

Быыстапкаҕа Сэмэн үөрэппит учуутала, ХИФУ преподавателэ Варвара Туласынова кэлэн, үөрэнээччитин ситиһиититтэн ис сүрэҕиттэн үөрдэ.

Киһи талаанын, ис туругун бөҕөргөтөр кулууп «Сайдыы» түмсүү салайааччыта айылҕа кэрэтин тарҕатар  Надежда Егорова Махтал суругу туттарда.

Оттон Үөһээ Бүлүү олохтооҕо, быйыл «Үс Кут, Үс Сэргэ» Өксөкүлээх Өлөксөй туруорбут Үс Сэргэтин улуустарынан Сэмэнниин экспедицияҕа сылдьыбыт Светлана Копыленко бу быыстапка буоларын истээт, анаан кэлбитин бэлиэтээтэ. Кини саамай сөбүлээбит хартыынатын аттыгар хаартыскаҕа түстэ.

Араас улуустартан быыстапкаҕа кэлбит дьон Семен Сивцев-Өймөкөөн Сэмэнэ хаартыскаларыттан харахтарын араарбакка, өргө диэри сөҕө-махтайа көрбүттэрэ.

Оттон бүгүн «Үргэл» галереятыгар аһыллыбыт быыстапка бастакы ыалдьыттарынан Саха гимназиятын төрдүс кылааһын үөрэнээччилэрэ буоллулар. Оҕолор Өймөкөөн кэрэ айылҕатын олус интэриэһиргээтилэр.

Оттон «Саха» НКИХ суруналыыһа Айталы Егорова «Саҥа күн» биэриигэ Семен Сивцев-Өймөкөөн Сэмэнэ «Үргэлгэ» оҥорбут быыстапкатыттан бэртээхэй биэрии бэлэмнээтэ.

 

Онон кэрэни уонна сырдыгы интэриэһиргээччилэр Дьокуускай куоракка “Үргэл” галереятыгар кэлэн кыһыҥҥы айылҕаны хоһуйар худуоһунньук үлэлэрин кытта ахсынньы 9 күнүттэн ахсынньы 11 күнүгэр диэри сылдьан, көрөр-истэр кыахтаннылар.

Өймөкөөн айылҕатын хаартыскаҕа үйэтитээччи,  Семен Сивцев-Өймөкөөн СэмэнэТымныы кыһын хаһаайынын Чысхаан брендин сайдыытыгар үлэлэһэр киһи быһыытынан  кэлэр нэдиэлэҕэ Москваҕа «Саха сирин күннэрэ» тэрээһиҥҥэ кытта барыаҕа. Бу быыстапкатын худуоһунньук Тымныы полюһа — Өймөкөөн туһунан сырдатар истиэндэҕэ туруоруоҕа.

Елена ПОТОЦКАЯ, «Саха сирэ» хаһыат, edersaas.ru

Ааптар хаартыскаҕа түһэриитэ.

#бүгүн: 1
6
0

Сайт матырыйаалларын ааптар көҥүлэ суох ылар бобуллар.