Федотовтар Кээччигэ холобур буолаллар

Ааптар: 
Бөлөххө киир:

Өлүөхүмэ улууһун Кээччи нэһилиэгин олохтоохторо Розалия уонна Александр Федотовтар бааһынай хаһаайыстыбатын 2015 с. тэриммиттэрэ.

Edersaas ru.

Билигин Кээччиттэн 11 көстөөх Көтөт учаастагар олороллор, 100 сылгылаахтар, ол иһигэр 45 биэлээхтэр, олортон отут биэ төрөөтө. Маны таһынан, 15 ыанар ынахтаахтар, ньирэйгэ иһэрдибиттэриттэн ордорон, күҥҥэ 100-110 лиитирэ үүтү эбэтэр ыйга үс туоннаны туттараллар.

Иллэрээ сыл саҥа саҕалыыр бааһынайдарга анаммыт федеральнай бырагыраама куонкуруһугар ситиһиилээхтик кыттан, 1,5 мөл. солк. грант ылан, «МТЗ-82» тыраахтары уонна племенной биэлэри атыыласпыттара. Быйыл сылгы базатын тэринэргэ биир мөлүйүөннээх граҥҥа тиксэннэр, саҥа дьиэ, баанньык, хараас, күрүө-хаһаа туттар санаалаахтар.

Бачча элбэх сүөһүгэ-сылгыга элбэх от наадата өйдөнөр. Ол иһин, Федотовтар Ой арыытыгар 120 гектар сири түүлэстилэр, манна 100 туоннаны, ону таһынан, сылгы базатын таһынааҕы сыһыыга 50 туонна оту бэлэмниэхтээхтэр. Биллэрин курдук, үүт соҕотуопкатыгар кыһалҕа суох буоллаҕына, убаһа этин батарыы уустуктаах. Ол иһин, Александр Михайлович «Сахаагропродукт» кэпэрэтиипкэ 2,5 туонна сылгы этин туттарарга дуогабардаста. Урукку өттүгэр Кээччи олохтоохторо сүүрүк аттарынан сураҕыраллара. Ол үгэһи сөргүтэн, эдэр фермердэр быйыл И.Н. Кульбертинов 100 сааһыгар анаммыт үбүлүөйдээх ыһыахха ат сүүрдүүтүгэр холоннулар.

15 саастаах Захар уонна 10 саастаах Миша төрөппүттэригэр номнуо туһа дьонноро. Үлэни өрө туппут бу эдэр ыалы көрөн, “тыа сирэ уйгу – олох туйгун” диэн бэргэн өс хоһоонун саныыгын. Кинилэр ситиһиилэрин кистэлэҥэ судургу: кинилэр иккиэн дьонноругар көмөлөһөн, сүөһү-сылгы үлэтин оҕо саастарыттан билэн улааппыттара, тыа хаһаайыстыбатын идэтин талбыттара. Александр Төҥүлүтээҕи кэллиэскэ бэтэринээр үөрэҕин, оттон Розалия СГТХА Өлүөхүмэтээҕи салаатыгар экономист үөрэҕин бүтэрбиттэрэ үлэни-хамнаһы тэринэллэригэр улахан төһүү буолар.

Федотовтар бэйэлэрэ үлэлииллэрин таһынан, үлэ миэстэтин таһааран, биир дойдулаахтарын хамнастаах үлэнэн хааччыйаллар.

Валерий Малышев, Өлүөхүмэ. “Саха сирэ” хаһыат, Edersaas ru. сайтыгар анаан.

Үлэни өрө туппут эдэр ыал  саха төрүт үгэһин тарҕатар

+1
0
+1
0
+1
0
+1
0
+1
0
+1
0
+1
0