Фигуристка Медведева Арассыыйаттан көһөн барыан сөбүн туһунан сураҕы быһааран биэрдэ
Фигурнай хаҥкылааһыҥҥа аан дойду икки төгүллээх чөмпүйүөнэ Евгения Медведева сонуну киэҥник тарҕатар сириэстибэлэр кини туһунан тарҕаппыт ускахтарын быһааран биэрдэ. Бу туһунан ааспыт бэнидиэнньиккэ, кулун тутар 5-гэр, Арассыыйа фигурнай хаҥкылааһыҥҥа федерациятын сайта иһитиннэрдэ.
edersaas.ru
Медведева суруналыыстартан кинини уонна тириэньэрин Этери Тутберидзены тыыппаттарыгар көрдөстө. “Биһиги салгыы үлэлиибит”, — диэн туран, өйгүтүттэн була сатаан суоҕу баар курдук кэпсээмэҥ, дьыаланан дьарыктаныҥ диэтэ.
Арассыыйа фигурнай хаҥкылааһыҥҥа федерацията бэйэтин өттүттэн СМИ биирдиилээн бэрэстэбиитэллэрэ сымыйа сураҕы туһана, тарҕата сатыылларын сөбүлээбэтин, маннык була сатаан киириини-тахсыыны кулун тутар 19-25 күннэригэр Милаҥҥа ыытыллар аан дойду чөмпүйэнээтин иннинэ Арассыыйа сүүмэрдэммит хамаандатыгар быһыыны-майгыны сытыырхата сатааһын курдук ылынарын иһитиннэрдэ.
Бу иннинэ СМИ-лэр Евгения Медведева атын дойду аатыттан күрэхтэһэргэ баҕа санаатын эппитин туһунан сураҕы тарҕаппыттара. SNC таһаарыы Медведева тириэньэрэ Тутберидзены кытта атааннаспыттарын туһунан кэпсээбитэ.
Роман Попов, “Саха сирэ” хаһыат, edersaas.ru