Ааспыт ыйга биһиги сайтпытыгар «Филиппинканы хаайан олорбут кэргэнниилэргэ дьыала тэрилиннэ», «Өрөспүүбүлүкэ борокуруора Леваднай, Попов, Мамчур дьыалаларын тустарынан», «Филиппины бэрэстэбиитэлэ кэллэ, Россияттан бэрэбиэркэ иһэр» диэн матырыйааллар бэчээттэммиттэрэ.
Вера МАКАРОВА, «Саха сирэ» хаһыат, edersaas.ru
Ити суруйуулар ис хоһооннорун кылгастык билиһиннэрдэххэ, Дьокуускай куорат олохтоохторо, кэргэннии Кристина уонна Александр Леваднайдарга РФ Холуобунай кодексатын 127-с ыст. 3-с чааһынан, ол эбэтэр, киһиэхэ ыарахан эчэйиини оҥорон туран, көҥүлү быһыы бэлиэтэ баарынан холуобунай дьыала тэриллибитэ.
Бу «Чистый дом» клининговай хампаанньа хотуна уонна кини эрэ — Дьокуускай куорат полициятын начальнигын солбуйааччы — биир дьиэ кыбартыыратыгар Филиппиныттан төрүттээх, дьиэ хомуйааччынан кинилэргэ үлэлии сылдьыбыт дьахтары кырбаан баран, күүс өттүнэн хоско хаайыыга уорбаламмыттара. Олунньу 12 күнүгэр филиппинка маҥнайгы этээс түннүгүттэн ыстанан куотан, ыарахан эчэйиилэри ылан, балыыһаҕа эпэрээссийэлэммитэ.
Бу быһылаан тула атыыр айдаан тахсыбыта. СӨ Борокуратуурата «Чистый дом» хампаанньа үлэ уонна миграция туһунан сокуоннары кэспитин-суоҕун быһаарар сыалтан бэрэбиэркэ саҕалаабыта. Силиэстийэ уорганнара холуобунай дьыаланы тэрийэн, билигин барыллааһын силиэстийэ бара турар. СӨ Ис дьыалаҕа министиэристибэтэ сулууспанан бэрэбиэркэ ыытан, А.Леваднайы ис дьыала уорганнарыттан уураппыттара.
СӨ Борокуратууратын пресс-сулууспата бүгүн иһитиннэрбитинэн, Дьокуускай куорат борокуратуурата бэрэбиэркэтэ түмүктэммит.
Бэрэбиэркэ быһаарбытынан, К.Левадная үлэтин эбээһинэһинэн, Филиппины Өрөспүүбүлүкэтин 15 гражданкатын көрсүөхтээх, үлэлиир усулуобуйаларын тэрийиэхтээх эбит. Ол эбээһинэстэргэ киирэллэр: аэропорка көрсүү, тылбаастааһын, олорор сиринэн уонна дьиэни хомуйааччыга наадыйар клиеннэринэн хааччыйыы.
Маныаха миграция сокуонун ирдэбиллэрин кэһэн, Левадная филиппинкалары учуокка туруортарбатах, бу омук дьахталлара Дьокуускай куорат сиригэр-уотугар сокуоннайа суох сылдьыбыттар.
Итинэн сибээстээн, Дьокуускай куорат борокуратуурата Левадная дьайыыларыгар РФ Холуобунай кодексатын 322.1 ыст. 1 чааһынан (сокуоннайа суох миграцияны тэрийии) көрүллэр буруй бэлиэтэ баарынан, бэрэбиэркэ матырыйаалларын силиэстийэ уорганнарыгар ыыппыт.
Ол матырыйаалларга олоҕуран, РФ Силиэстийэлиир кэмитиэтин Саха сиринээҕи управлениетын Дьокуускай куораттааҕы отдела холуобунай дьыала тэрийдэ. Билигин силиэстийэ барар.
Дьыала хаамыыта борокуратуура хонтуруолугар сылдьар.
Вера МАКАРОВА, «Саха сирэ» хаһыат, edersaas.ru
Хаартыска: интернеттэн.