Мас тардыһар күүстээх кыргыттар — «Бастыҥ спортсмен» финалистара

Ааптар: 
Бөлөххө киир:

«Саха сирин киэн туттуута» норуот бириэмийэтин «Спортсмен» номинациятыгар икки кэрэ кыыс финалга тахсан, эр хоһууннары кытта куоластааһыны аастылар. 

edersaas.ru

Саха дууһалаах Сардаана

Сардаана Осипова төһө да сахалыы ааттааҕын иһин, саха хаана суох. Ол эрээри бэйэтин «дууһабынан сахабын» дэнэр. Кыыс эһэтэ Белоруссияттан төрүттээх, эбэтин өттүнэн — Дон казактара. Кини сэттэ оҕолоох ыалга иккис оҕо. Ийэтэ оҕо саадыгар үлэлиир, аҕата СӨ «Аҕа Лигата» түмсүү биллиилээх уопсастыбынньыга. «Бастыҥ спортсмен» номинация финалиһа баһаарынай тэрилтэҕэ инспекторынан үлэлиир.

Мас-рестлинг курдук спорт көрүҥэр кыыс метеор курдук түргэнник өтөн киирбитэ. Ол курдук, үс сыл иһигэр кини Европа, Арассыыйа чөмпүйүөнүнэн буолбута.  2017 аан дойду Кубогын ылар чиэскэ тиксибитэ.  Бүгүн Сардаана Осипова — мас-рестлинг курдук кэскиллээх спортивнай көрүҥ сирэйэ. Кыыс бу көрүҥҥэ номнуо биллэр спортсмен быһыытынан кэлбитэ. Кроссфит, пауэрлифтинг, армлифтинг курдук күүстээх көрүҥнэргэ РФ уонна норуоттар икки ардыларынааҕы спорт маастарын нуорматын толорбута. Сардаана бэйэтин көрүҥэр күүстээх утарсыһааччыларынан Венгрия уонна Германия спортсменкаларын ааҕар. Арассыыйаттан Кабардино-Балкарскай Өрөспүүбүлүкэ кыргыттарын ааттыыр.

Ол эрээри саамай күүстээх күрэстэһээччилэрим Саха сиригэр бааллар. Былырыын Арассыыйатааҕы чөмпүйэнээт финалын аҥарыгар Наташа Черноградскаялыын күөн көрсүбүтүм. Ол күрэстэһиини ыараханнык ылыммытым, — диэн кэпсиир Сардаана Осипова.

Уруһуйдуур уонна хоһоон суруйар күүстээх кыыс

Ирина Севрюк Томпо улууһун Хаандыгатыттан төрүттээх. Оскуолаҕа үөрэнэ сырыттаҕына ийэтэ кыыһын мас тардыһыытын күрэхтэһиитигэр Саха сирин чөмпүйэнээтин  көрдөрө илдьибит. Кыыс онно аан бастаан мас тардыһыытын көрөн баран, олус сөбүлээбит эрээри, кини төрөөбүт Хаандыгатыгар бу көрүҥҥэ дьарыктаабаттар эбит. Дьокуускайга ХИФУ педагогическай факультетыгар үөрэнэ киирэн баран, кыыс баҕа санаатын дьэ толорбут. Мас-рестлинг көрүҥэ кини сөбүлүүр дьарыгынан буолбут.

Өрөспүүбүлүкэ уонна Арассыыйа хас да төгүллээх чөмпүйүөнэ оҕо эрдэҕиттэн сытыы кыысчаан этэ. Кыргыттары кытта куукулунан оонньуурдааҕар уолаттары кытта футболга оонньуурун быдан ордороро.  Ол да иһин буолуо, армрестлинг, армлифтинг, баскетбол, акробатика  курдук спортивнай көрүҥнэри кыыс тута баһылаабыта. Ол эрээри бу күүстээх көрүҥнэртэн мас-рестлинг — спортсмен саамай сөбүлүүрэ. Ирина «Статика» спортивнай саалаҕа инструкторынан үлэлиир. Доҕотторо кэпсииллэринэн уруһуйдуур, хоһоон суруйар. Билигин английскай уонна испанскай тылларынан дьарыктанар. Грузияҕа, Арменияҕа, Вьетнамҥа сынньанарын сөбүлүүр.  Эдэр спортсмен мас-рестлинг көрүҥэ хаһан эрэ олимпийскай оонньууларга киирэригэр баҕарар.  Ирина Севрюк олимпиадаҕа бу күүстээх көрүҥҥэ чахчы  Саха сирин дорҕоонноохтук ааттатыа этэ.

Ити курдук,  «Саха сирин киэн туттуута» бириэмийэ «Бастыҥ спортсмен» номинациятын финалистара, иккиэн мас тардыһыытыгар тэҥнээхтэрин булбатах кыргыттар, бастыҥнар ахсааннарыгар сылдьыахтарын сылдьаллар.

Елена ПОТОЦКАЯ, «Саха сирэ» хаһыат, edersaas.ru

Хаартыска — интернеттэн.

+1
0
+1
0
+1
0
+1
0
+1
0
+1
0
+1
0