Wildberries онлайн интэриниэт-маҕаһыын генеральнай дириэктэрэ Татьяна Бакальчук 2004 с. бастакы оҕотун көрөн олорон интэриниэт нөҥүө таҥас-сап атыытын кэргэнин Владиславы кытта Москваҕа кыараҕас кыбартыыраҕа олорон эрэ саҕалаабыттара. Онтон сакаас элбээн, урбааннара күн-түүн сайдан, харчы эргийэн барбыта. Wildberries саайтын билигин күн ахсын 2 мөл. киһи киирэн көрөр, кинилэр 160-180 000 сакаас оҥороллор. Бырааһынньыктарга, сыана түһэр кэмигэр сууккаҕа 300 тыһ. сакаас киирэр. Бакальчуктар таҥаһы эрэ буолбакка, киһи туттар табаарын барытын интэриниэт нөҥүө атыылыыллар.
edersaas.ru
Татьяна Бакальчук биир сыл иһигэр 180 мөл. дуоллары оҥорон, Forbes испииһэгэр иккис миэстэни ылла. 2017 сылы кытта тэҥнээтэххэ, кини баайа 420 мөл. дуоллартан 600 мөл. тиийдэ. Былырыын интэриниэт-маҕаһыын киллэрэр харчыта 40% үрдээн, 63,8 млрд солк. тэҥнэспитэ.
Оттон бастакы миэстэҕэ Москва куорат урукку баһылыгын Юрий Лужков кэргэнэ, «Интеко» девелоперскай хампаанньа бэрэсидьиэнэ Елена Батурина сылдьар. Арассыыйа саамай баай кэрэ аҥаара 1,2 млрд дуоллар бас билэр баайдаах, ааспыт сылы кытта тэҥнээтэххэ, кини хапытаалын 200 мөл. дуолларга тиийэ улаатыннарда.
Үһүс — «Монако» французскай футбольнай кулууп бэрэсидьиэнэ Дмитрий Рыболовлев урукку кэргэнэ Елена Рыболовлева. Кини 600 мөл. дуоллардаах баайын кэргэниттэн арахсарыгар ылбыта.
S7 хампаанньа Дириэктэрдэрин сүбэтин бэрэссэдээтэлэ, «Сибирь» уонна «Глобус» авиахампаанньа акционера Наталья Филева 600 мөл. дуоллар суумалаах бас билэр баайдаах. S7 авиахампаанньа Аэрофлот кэнниттэн дьону таһыыга иккис миэстэни ылар.
Арассыыйа биэс саамай баай дьахталларын испииһэгин «Прогресс Капитал» ас-үөл хампаанньатын Дириэктэрдэрин сүбэтин чилиэнэ, Лебедянскай собуот урукку акционера Ольга Белявцева түмүктүүр. Кини баайа 500 мөл. дуолларга тиийбит.
Wildberries холобурун ыллахха, дьиэҕэ оҕо көрөн олорор эдэр ийэлэр тугу эрэ интэриэһинэйи толкуйдаан, суохтан баары оҥорон, урбааны кыраттан саҕалаан, халыҥ харчыны эргитэн, Forbes испииһэгэр киириэхтэрин сөп эбит.
Марианна Тыртыкова, «Саха сирэ», edersaas.ru