Фотосуруналыыс Петр Оконешников “кырдьаҕас уонна эдэр” Дьокуускайа (ХААРТЫСКА)

Чахчы да, быйылгы “Куорат күнэ” уратылаах буолла. Хаһааҥҥытааҕар даҕаны элбэх кыттааччылаах, элбэх араас тэрээһиннээх, бэртээхэй кэнсиэрдээх, куонкурустаах, быыстапкалаах… Саамай үчүгэйэ – тэрийиитигэр, ыытыытыгар куорат олохтоохторо улаханныын-кыралыын, арааһа, бука бары кытыннылар.

Ол курдук, бэрт көхтөөхтүк “Якутск глазами горожан” фотокуонкурус ыытылынна. Бу, Дьокуускайга Үтүө санаа сылыгар анаан ыытыллыбыт куонкуруска, биллэн турар, үгүс үлэ киирбититтэн, “Киин куораппынан киэн туттабын”  номинацияҕа биһиги биир идэлээхпит, өрөспүүбүлүкэ бэчээтин бэтэрээнэ, суруналыыс, уопуттаах фото-худуоһунньук Петр Оконешников кыайыылааҕынан тахсан, I истиэпэннээх дипломунан наҕараадаланна.

Айымньылаахтык, далааһыннаахтык үлэлиир биллиилээх фотосуруналыыс бу куонкуруска отуттан тахса сыл устата түһэрбит хаартыскаларыттан сүүмэрдээн, “Кырдьаҕас уонна эдэр куорат” диэн тиэмэлээн, 40-ча хаартысканы киллэрбитин Дьүүллүүр сүбэ үрдүктүк сыаналаата. Бу үлэлэргэ үйэтитиллибит биһиги тапталлаах куораппыт  уруккута уонна билиҥҥитэ — Дьокуускайбыт хайдах курдук үүнэн-сайдан иһэрин арылхай туоһута.

Манна даҕатан эттэхпинэ, Петр Семенович куорат фотокуонкуруһугар былырыын эмиэ бастаан турар. Онон, арааһа, сотору кэминэн биһиги кинини Дьокуускай фотолетописеһинэн сүрэхтиэхпит турдаҕа.

Татьяна Маркова, «Саха сирэ» хаһыат, edersaas.ru