Француз бэлисипиэтэ алдьанан, Өймөкөөҥҥө массыынанан барда

Ааптар: 
Бөлөххө киир:

 Француз экстремала Ив Чалоин Томпо улууһун Хаандыгатыгар тиийэн, бэлисипиэтин көлүөһэлэрэ тэһиннилэр.  

edersaas.ru


Онон француз экстремала салгыы айаннаабат буолла. Бу туһунан кинини ыраахтан массыынанан арыаллыы сылдьар бөлөҕү тиэйэ сылдьар Роман Константинов иһитиннэрдэ. Сарсыарда 9 ч.  суоппар  миэхэ батсаабынан маннык суруйбут: «Биһиги билигин Хаандыгаҕа баарбыт. Хомойуох иһин, Ив бэлисипиэтин көлүөһэтэ алдьанан, Өймөкөөҥҥө айанын тохтоторго күһэлиннэ. Европаттан  камерата суох саҥа көлүөһэлэри сакаастаата. Онон бастаан утаа айанын трассатын үөрэтэ таарыйа, Өймөкөөҥҥө массыынанан баран кэлиэхпит. Онтон Дьокуускайга төннөн, Ив Европаттан кэлэр баһыылкатын кэтэһиэҕэ. Ол кэнниттэн Ив Чалоин Өймөкөөҥҥө бэлисипиэтинэн айанын Хаандыгаттан хаттаан саҕалыаҕа».

Дьэ, онон уһун-синньигэс айан буолсу. Саамай кылаабынайа,  ыраахтан кэтээн көрөөччүлэр киниэхэ интэриэстэрин сүтэрииһилэр. Тоҕо диэтэххэ, саамай тыҥааһыннаах кэмҥэ — Кириһиэнньэ тымныыта түһэн турдаҕына, француз айаннаабат буолла! Иккиһинэн, массыынанан тиийэн айанын трассатын үөрэтэн кэлэрэ — бэйэтин тустаах былааныттан тэйии буолар. Үсүһүнэн, бэлисипиэтин көлүөһэлэрин атыҥҥа уларытан, айанныыр усулуобуйатын чэпчэтэр буоллаҕа. Аны таҥаһын эмиэ эбинэрэ, халыҥатара чахчы. Ол эрээри биир өрүт олох дьэҥкэ — Ив Чалоин Өймөкөөҥҥө бэлисипиэтинэн айана бастакы холонууттан табыллыбата! Эмиэ кытай туриһын курдук, француз экстремал-туриһа Хаандыгаҕа тиийэн тохтоото. Кытай туриһа Ча Эрдаан өссө кэлиэх буолан, Хаандыгаттан төннүбүтэ. Кини да Өймөкөөҥҥө массыынанан тиийэн, трассаны үөрэтэн баран, ох курдук оҥостон салгыы айанныан сөп этэ. Ол эрээри Өймөкөөҥҥө өссө да кэлиэм диэн,  суолун-ииһин эрдэттэн билсибэккэ барбыта.

Өймөкөөҥҥө омуктары түһэрэр предприниматель Тамара Васильеваттан Ив Чалоины хайдах көрсөөрү сылдьарын ыйыталаспыппар, киһим маннык хоруйдаата:

Мин Дьокуускайга сырыттахпына, француз экстремал-туриһын кэргэнэ дьиэбэр кэлэн хонон ааспыт этэ. «Кэргэним бэлиспиэтинэн кэлиэхтээх. Ол иһин эрдэттэн бу сири-көрө истэ сылдьабын»,— диэбит этэ. Миэхэ кэлэр омук туристара турфирмалар уонна туроператордар нөҥүө тэрээһиннээхтик кэлэн бараллар. Бу күннэргэ дьиэм иһэ араас дойду дьонунан толору. Соторутааҕыта Вьетнамтан уонна Индияттан кэлэн бардылар. Бүгүн Германияттан 7 турист кэлиэхтээх. Миэхэ французтар кэлэбит диэн сайаапка түһэрбэтэхтэрэ. Арааһа, трассаларын үөрэтэ сылдьар буоллахтарына, хоммокко да төннөллөрө буолуо.

Бу күннэргэ, Кириһиэнньэҕэ, Өймөкөөҥҥө — 59 кыраадыстаах тымныы түһүөхтээх. Маннык тымныыга массыыналаах да дьон айанныыртан сэрэхэдийэллэр.

Дьэ, онон Өймөкөөн тымныытын кытта ыраах Кытайтан уонна Францияттан кэлэн, экстремал туристар күөн көрсөн көрдүлэр да, бастакы сырыылара табыллыбата. Көлөлөрө аккаастаата. Өскө кытай бэйэтин баҕатынан айанныы сатаабыт эбит буоллаҕына, француз арыалдьыттаах, рациялаах, быыһыыр сулууспаларга биллэрэн, быһата, ох курдук оҥостон айаннаата.

Ол эрээри көлөтө — бэйэтин омугун бэлисипиэтэ кытаанах айаны тулуйбата…

Елена ПОТОЦКАЯ, «Саха сирэ», edersaas.ru 

Хаартыскаҕа Ньургуйаана Толстякова түһэриитэ.

+1
0
+1
0
+1
0
+1
0
+1
0
+1
0
+1
0