Биһиги куораппытыгар Дьокуускайга AccorHotels диэн французскай гостиничнай оператор Mercure (салайар оператора Accor Group) норуоттар икки ардыларынааҕы брендинэн 150 нүөмэрдээх саҥа гостиницаны тутар үһү, диэн сурах кэллэ.
Бииргэ үлэлэһии туһунан онуоха туһааннаах меморандумҥа Владивостокка Илиҥҥи экономическай форумҥа «Рашэн Мэнэджмэнт Хотэл Кампани» (Москва, Accor регионнааҕы салаата Арассыыйаҕа, Грузияҕа, СНГ дойдуларыгар) ХЭУо дириэктэрэ Алексис Деларофф, «Алмазэргиэнбаан» АКБ бырабылыанньатын бэрэссэдээтэлэ Людмила Николаева уонна «АЭБ Капитал» (100% Алмазэргиэнбаан бас билиитигэр) гендириэктэрэ Игорь Борисов илии баттаспыттар.
Барыллаан этиинэн, отель 2020 сыл кэнниттэн аһыллыахтаах.
“Интерфакс” иһитиннэрэринэн, AccorHotels бөлөх – 4,5 тыһ. отели түмэр, 100 дойдунан үлэлиир, аан дойду биир биллэр-көстөр гостиничнай оператора буолар. Онон, өскөтүн туттахтарына, дьэ мааны гостиница буолар чинчилээх.
Манна даҕатан эттэххэ, 2017 сыл бүтүүтүн диэки инвестиция сайдыытын уонна предпринимательство эдэр миниистирэ Антон Сафронов, туох да диэбит иһин, эмиэ бэрт интэриэһинэй этиини киллэрэ сылдьыбыт эбит — кини американскай “Хилтон” гостиница тутуллуутугар үлэлэһэн испитэ. Эмиэ 150 нүөмэрдээх, 8 этээстээх, монолит-каркас гостиница бырайыагын туһунан кэпсэтэн испитэ баара… Сир, тутааччы, үлэлэтээччи баара, оттон, дьэ, харчы суоҕа…
Оттон билигин харчы көстүө дуу? Уонна, манна кимнээх үлэлиэхтэрэй – тутуутугар, хааччыйыытыгар? Ону, биллэн турар, бириэмэ-кэм көрдөрүөҕэ.
Бүгүн Владивосток куоракка IV Илиҥҥи экономическай форум үлэтин түмүктүүр. СӨ Ил Дарханын э.т. Айсен Николаев араас хайысхалаах боппуруостарга бииргэ үлэлэһиигэ сөбүлэһиилэри түһэрсэрин кэтээн көрөбүт. ВЭФ сессиятыгар кини предпринимательствоны сайыннарыы эйгэтигэр, бизнеһи тэрийиигэ ордук усулуобуйалары тэрийиигэ, Саха сиригэр инвестиционнай үлэлэри сайыннарыыга кэккэ этиилэри киллэрдэ. Хайа баҕарар инвестиционнай бырайыакка, өрөспүүбүлүкэ олохтоохторун салгыы үлэнэн хааччыйар инниттэн, кинилэри үөрэтии боппуруостара булгуччу киллэриллиэхтээхтэрин чорботон бэлиэтээбитин болҕомтоҕо ыллыбыт.
Татьяна Маркова, edersaas.ru
Хаартыска Интернеттэн.