2018 сылтан чааһынай дьон гааһы түҥэтэр ситимҥэ техническэй өртүнэн холбоноллоругар, дьиэлэриттэн гаас ситимэ төһө ырааҕа-чугаһа тутулуктаммат буолла. Гаас ситимиттэн 10 миэтэрэттэн тэйиччи сытар учаастактаах ыаллар ититии турбатын тардалларыгар төлөбүрдэрэ 7461 солк. (14%) чэпчээтэ.
Онон, быйылгыттан гаастан төһө ыраах учаастактааҕыҥ учуоттаммат, харчытыгар охсубат буолла. Урукку өртүгэр гааска холбонорго уон миэтэрэттэн чугас, эбэтэр уон миэтэрэттэн ыраах диэн төлөбүрүн суоттаан таһаараллара.
Оттон учаастактара гаас ситимиттэн 200 миэтэрэттэн бэтэрээ сытар түгэнигэр:
- Урбааҥҥа гааһы ороскуоттуурга муҥутаан биир чааска 15м3 тахсыбат түгэнигэр, НДС нолуогун аахпакка, техническэй холбонуу төлөбүрэ 52720,81 солк.
- Гааһы туһанар оборудованиелаах чааһынай дьон күөх төлөнү муҥутаан биир чааска 5м3 таһаарбат түгэннэригэр, НДС нолуогун аахпакка, техническэй холбонуу төлөбүрэ 49768, 45 солк.
- Гааһы туһанар оборудованиелаах атын дьон күөх төлөнү муҥутаан биир чааска 5м3 таһаарбат түгэннэригэр, НДС нолуогун аахпакка, техническэй холбонуу төлөбүрэ 52720,81 солк.
Маннык төлөбүр Саха сирин үрдүнэн чааһынай дьоҥҥо уонна тэрилтэлэргэ олохтонно. Тарыып туһунан сиһилии СӨ Сыана бэлиитикэтигэр судаарыстыбаннай кэмитиэт сайтыгар киирэн көрүөххүтүн сөп.
Марианна Тыртыкова, «Саха сирэ», edersaas.ru