Галина Данчикова анал көрсүһүүгэ дойду бүддьүөтүн туругун туһунан кэпсээтэ
РФ Госдууматын дьокутаата Галина Данчикова Дьокуускай куоракка анал көрсүһүүгэ 2018 сыллааҕы федеральнай бүддьүөт бырайыагын туһунан билиһиннэрдэ.
Дьокутаат кэлэр сылтан бүддьүөтү кумааҕынан буолбакка, сүрүн үп докумуонун электроннай көрүҥүнэн көрдөрүөхтэрэ диэн бэлиэтээн эттэ.
2017 сылы кытта тэҥнээтэххэ, 2018 сылга дохуот үрдүүрэ күүтүллэр. Ол курдук, 2018 сылга 15,257 трлн солк (2017 сылы кытта тэҥнээтэххэ, 3,6 %-нан үрдүүр), 2019 сылга 15,555 трлн солк, 2020 сылга 16,285 трлн солк. тэҥнэһэр. Оттон ороскуот 2018 сылга 16,529 трлн солк, 2019 сылга 16,374 трлн солк уонна 2020 сылга 17,155 трлн солк буолуоҕа. Көрөрбүт курдук, тиийбэт буолуу (дефицит) кыччаан иһэр. Дойду экэниэмикэтигэр бигэ үрдээһин баар буолуо, үс сылга ол 2,1-2,3 %-ҥа тэҥнэһэр. Федеральнай бүддьүөккэ барыта социальнай хайысхалаах 40 бырагыраама киирбит.
«Бүддьүөт бырайыагын оҥорууга дойду экэниэмикэтэ бигэ туруктаах буоларыгар, судаарыстыбаннай сүрүн бырагыраамалары олоххо киллэриигэ уонна регионнар үп өттүнэн этэҥҥэ буолалларыгар сүрүн болҕомто ууруллар», – диэн Галина Иннокентьевна быһааран биэрдэ.
Александр ТАРАСОВ, «Саха сирэ» хаһыат, edersaas.ru