Бу күннэргэ РФ Госдууматыгар дойду үбүн сүрүн докумуонун быһаарыы бара турар. Ол чэрчитинэн РФ бырабыыталыстыбатын вице-премьерэ Дмитрий Козак уонна РФ үбүн миниистэрэ Антон Силуанов кыттыылаах «Бырабыыталыстыба чааһыгар» бүддьүөт сыһыаннаһыыларын саҥардыыны быһаарсыахтара.
Бу иннинэ Саха сириттэн «Биир ньыгыл Арассыыйа» баартыйа дьокутаата, бүддьүөккэ уонна нолуокка, бүддьүөт сыһыаннаһыыларын кэмитиэтин чилиэнэ Галина Данчикова РФ Үбүн министиэристибэтигэр регионнарга быһаччы сыһыаннаах биэнсийэҕэ социальнай төлөбүр төһө буолуохтааҕын уонна федеральнай бүддьүөттэн көрүллэр тулаайах оҕолору дьиэнэн хааччыйыыга субсидия үрдүүрүн-үрдээбэтин туһунан ыйыппыта.
Регионнарга сытыы боппуруоһунан тулаайах оҕолору дьиэнэн хааччыйыы буолар. Тулаайах оҕо ахсаана элбээн иһэр. Холобур, 2013 сылга Саха сиригэр уочаракка 393 тулаайах оҕо турбут буоллаҕына, 2015 сылга 1148 оҕо сүрүн испииһэккэ киирбит. Оттон 2017 сылга 1259 оҕо уочаракка турбут. 2012 сылтан бу боппуруоһу быһаарыыга өрөспүүбүлүкэ бүддьүөтүттэн сыл аайы 900 мөл солк тиийэ көрүллэр эрээри, ити үбүнэн тулаайах оҕолору барыларын дьиэнэн хааччыйыы хайдах да кыаллыбат.
Александр ТАРАСОВ, «Саха сирэ» хаһыат, edersaas.ru