Дьокуускай куорат федеральнай суута киин куоракка уорууларынан дьарыктаммыт бөлөххө бириигэбэр таһаарда.
Вера МАКАРОВА, «Саха сирэ» хаһыат, edersaas.ru
Суут быһаарбытынан, бу 20, 21, 22 саастаах, ханна да үлэлээбэт уолаттар 2016 сыл алтынньы 9-11 күннэригэр эрдэттэн киксэн, анаан-минээн уора диэн, Беринг уонна Өктөөп 50 сыла автострада уулуссаларыгар турар гараастарга тиийбиттэр.
Ол тиийэн, түөрт гараастан мопеды, үрдэриллэр тыыны, массыына саппаас чаастарын, көлүөһэтин диискэлэрин, автомагнитоланы уоран тахсыбыттар.
Ол кэнниттэн икки уол алтынньы 16 күнүгэр Жатайга контейнертан лебедканы, акустическай колонкалары уонна мультиварканы сойбоппут.
Оҥорбут хоромньуларын уопсай суумата 139.540 солк. тэҥнэспит. Барыллааһын силиэстийэ кэмигэр уоруллубут малларын сороҕо булуллан, хаһаайыттарыгар төннөрүллүбүт.
Сууттанааччылар буруйдарын толору билинэннэр, кинилэр хадатаайыстыбаларынан суут бу дьыаланы ураты бэрээдэгинэн көрбүт.
Суут уурааҕынан, биир уоруйах 3 сыл 8 ыйга көс-холуонньаҕа көҥүлэ быһыллыбыт, иккис — 3 сыл 6 ыйга көҥүлэ быһыллыбыт, үһүс — 3 сыл усулуобунай миэрэнэн накаастаммыт.
Бириигэбэр сокуоннай күүһүгэр киирэ илик.
Бу туһунан СӨ Борокуратууратын пресс-сулууспата иһитиннэрдэ.
Вера МАКАРОВА, «Саха сирэ» хаһыат, edersaas.ru
Хаартыска: интернеттэн.