Гаврил Андросов – Арассыыйа Суруйааччыларын сойууһун сэкирэтээрэ

Бөлөххө киир:

Соторутааҕыта Москваҕа буолан ааспыт Арассыыйа Суруйааччыларын сойууһун ХV сийиэһигэр Эдэр литератордар сэбиэттэрин этии киллэриитинэн,  дойду ордук көхтөөхтүк, айымньылаахтык үлэлиир регионнарыттан бу сэбиэт чилиэннэрэ — хас да эдэр суруйааччы Арассыыйа Суруйааччыларын сойууһун сэкирэтээринэн талылыннылар.

Кинилэр ортолоругар биһиги биир дойдулаахпыт, биир идэлээхпит, “Чолбон” сурунаал кылаабынай эрэдээктэрин солбуйааччы, Саха сирин Суруйааччыларын сойууһун бырабылыанньатын бэрэссэдээтэлин солбуйааччы, эдэр бэйиэт Гаврил Андросов баара кэрэхсэбиллээх.

Сийиэс үлэтиттэн итинник эбии иһитиннэрии кэллэ.

Биллэрин курдук, Арассыыйа Суруйааччыларын сойууһун бырабылыанньатын сэкирэтийээтэ 2017 сыл олунньу 7 күнүгэр, эдэр бэйиэттэр Василий Попов, Сергей Бударин, прозаик Андрей Тимофеев көҕүлээһиннэринэн, Эдэр литератордар сэбиэттэрин тэрийбитэ.

Саха сирин Суруйааччыларын сойууһун рекомендациятынан бу сэбиэккэ  Гаврил Андросов киирбитэ.

Эдэр суруйааччылар Рустам Каженкин, Гаврил Андросов, Зинаида Архипова, Александра Попова пресс-конференцияҕа

Манна даҕатан эттэххэ, эдэр суруйааччылары кытта ситимнээх үлэни ыытарынан, Саха сирэ атын регионнарга холобурга сылдьар. Ол курдук,  норуодунай бэйиэт Наталья Харлампьева салайар сойууһа 2004 сылтан саҕалаан, быйыл саас хайыы-үйэҕэ 8-с төгүлүн эдэр суруйааччылар сүбэ мунньахтарын ыытаары сылдьар. Арассыыйа Суруйааччыларын сойууһун чилиэнинэн 12 киһи буолла.

Татьяна МАРКОВА, “Саха сирэ» хаhыат, edersaas.ru

+1
0
+1
0
+1
0
+1
0
+1
0
+1
0
+1
0