Гаврил Кириллин тас сибээс миниистиринэн ананна

Бөлөххө киир:

Быйыл тас сибээс уонна норуоттар дьыалаларыгар туспа министиэристибэ тэриллибитэ. Миниистир э.т. Дьокуускай куоракка Тас сибээс уонна инвестиционнай бырайыактары олоххо киллэрэр департамент салайааччытынан үлэлии олорбут Гаврил Кириллин анаммыта. Кини кандидатуратын Ил Түмэн дьокутааттара иккис пленарнай мунньахтарыгар бигэргэттилэр.

Гаврил Витальевич кытай, английскай тылын учуутала идэлээх. Үөрэҕин бүтэрэн баран, “Азия оонньууларыгар”, “Сахаполиграфиздат”, “СахаЭКСПОмамонт” тэрилтэлэргэ үлэлээбитэ. Тас сибээс министиэристибэтигэр кини 2008 с. үлэлиир. Бу үлэлиир сылларыгар аан дойдутааҕы тэрээһиннэри ыытыспыта. Ол иһигэр “Мегапроекты России” экономическэй форуму, “Хотугу-Илиҥҥи Россия биир кэлим сайдыыта” норуоттар икки ардыларынааҕы конференцияны. Оттон Дьокуускай куорат дьаһалтатыгар үлэлии сылдьан, Грецияны, Кытайы, Турцияны, Японияны кытары үлэлэспитэ.
Миниистир быһыытынан, Россия эрэгийиэннэрин, тас дойдулары кытары үлэлэһэрин таһынан, кэнэҕэскитин аҕыйах ахсааннаах хотугу норуоттар боппуруостарыгар болҕомто уурар санаалаах.

Ыспыраапка:
Кириллин Гаврил Витальевич
1981 с. ыам ыйын 1 күнүгэр Дьокуускайга төрөөбүтэ;
2004 с. – Хабаровскайдааҕы педагогическай судаарыстыбаннай университеты бүтэрбитэ;
2004-2006 сс. – “Сахаполиграфиздат” кылаабынай исписэлииһэ;
2006-2007 сс. – “Азия оонньуулара” норуоттар икки ардыларынааҕы спортивнай оонньуу дириэксийэтин кылаабынай исписэлииһэ;
2007-2008 сс. – “СахаЭКСПОмамонт” ААУо менеджер-тылбаасчыта;
2008-2012 сс. – Тас сибээс министиэристибэтигэр сүрүннүүр, кылаабынай исписэлиис;
2010 с. – Судаарыстыбаннай сулууспа Уһук Илиннээҕи академиятын үөрэнэн бүтэрбитэ;
2012-2018 сс. – Дьокуускай куорат тас сибээһин отделын, департаменын салайааччыта.

Аграфена КУЗЬМИНА, “Саха сирэ” хаһыат.

+1
0
+1
0
+1
0
+1
0
+1
0
+1
0
+1
0