Бүлүү улууһун дьокутааттарын сэбиэтин бэрэссэдээтэлэ Гаврил Корякин быыбар түмүгүнэн урукку сыллааҕар быыбарга аҕыйах киһи сылдьыбытын, быыбар күнүн атын кэмҥэ ыытар ордугун бэлиэтиир.
“Нэһилиэк баһылыгын быыбара суох нэһилиэнньэлээх пууннарга дьон кэлиитэ аҕыйах, атын да нэһилиэктэргэ, Бүлүү куоракка да эмиэ урукку сыллааҕар арыый мөлтөх”, — диэн иһитиннэрэр Гаврил Семенович.
Итини кини билигин дьон кыстыкка бэлэмнэнэр, сорохтор уоппускаҕа сылдьалларынан быһаарар. “Билигин киһи барыта кыстыкка бэлэмнэнэр. Ким дьиэтин-уотун оҥостор, ким сир астыыр, ким уоппускаттан саҥа кэлэр. Ол иһин Саха сиригэр быыбар күнүн саас кулун тутарга эбэтэр муус устарга ыытар ордук”, — диэн иһитиннэрэр.
Ону таһынан Гаврил Корякин аҕыйах ахсааннаах нэһилиэктэргэ баһылыгы аныыр ордугун, нэһилиэк баһылыктара манна быһаарар оруолу ылыахтаахтарын этэр. “Кистэл буолбатах, билигин нэһилиэктэргэ аймахтарынан, түөлбэлэринэн арахсан куоластааһын барар. 2003 с. бэйэни салайыныыга киирбиппит да, билиҥҥитэ итини нэһилиэнньэ өйдүү илик. Ол иһин аҕыйах ахсааннаах нэһилиэктэргэ баһылыгы аныыр ордук ээ”, — диэн бэлиэтиир уонна манна нэһилиэк баһылыктарыгар болҕомто ууруллуохтааҕын, хас биирдии кандидат үлэтигэр эппиэтинэстээхтик сыһыаннаһыахтааҕын этэр.
Быйылгы быыбарга нэһилиэк баһылыктара дохуоттарын көрдөрөр ыспыраапкалаах буолуохтаахтара ыйыллыбыта. Бу туһунан Гаврил Семенович: “Улуус таһымыгар уонна улуус киинигэр дьокутааттар декларация биэрэллэрэ сөп. Оттон нэһилиэктэргэ бу маны ылан кэбиһиэх баара. Киин сиртэн ыраах, суола-ииһэ суох нэһилиэктэргэ ыспыраапка ылыы сүрдээх уустук”, — диэн этэр.
Алта чаастааҕы дааннайынан, Бүлүүгэ быыбардааччылар 57,35 % куоластаатылар.
Аграфена КУЗЬМИНА, “Саха сирэ” хаһыат, edersaas.ru.