«ЯТЭК» хампаанньа Мэҥэ Хаҥалас улууһугар туруорсар гааһы таҥастыыр собуотун бырайыагын утарсан, олохтоох нэһилиэнньэ хаста да миитиҥҥэ тахса сылдьыбытын кэннэ бу боппуруос уота-күөһэ сөҕүрүйбүт курдук буолла. Күннээх Дагестантан төрүттээх миллиардер Магомедовтар 2 млрд тахса бүддьүөт харчытын суйдааһыҥҥа уорбаланан хаайыллыбыттарын кэнниттэн, баҕар, собуот тутуута олох да тохтотуллубута буолаарай диэн СӨ Айылҕа харыстабылын миниистириттэн ыйыталастыбыт.
edersaas.ru
«Федеральнай таһымнаах экологическай экспертиза бигэргэтиитэ суох биир да бырамыысыланнас собуота тутуллубат. Бырайыак иннинээҕи ОВОС (тулалыыр эйгэҕэ сабыдыалын үөрэтэр) докумуон ситэтэ суох, сорох ирдэбиллэргэ эппиэттээбэт буолан, төттөрү биэрбиппит. Ол кэннэ карбамид оҥорор метаноловай собуот тутуутун бырайыагын киллэрбэтэхтэрэ», — диэн Сахамин Афанасьев хоруйдаата. Онон, билиҥҥитэ газохимическай собуот тутуута тохтоон турар. Маннык түгэҥҥэ үөрэр эрдэ соҕус. Сарсын «ЯТЭК» саҥа салалтата хайа диэки хайыһарыттан бу бырайыак инникитэ улахан тутулуктаах.
Марианна Тыртыкова, «Саха сирэ», edersaas.ru