СӨ Ил Дархана Егор Борисов уонна “Газпром” хампаанньа бэрэссэдээтэлэ Алексей Миллер бэҕэһээ Санкт-Петербурга аан дойдутааҕы экономическэй форум кэмигэр Саха сиригэр 2026 с. диэри гаастааһын сайдыытын бырагырааматын бигэргэттилэр, бииргэ үлэлэһэргэ өссө эбии дуогабар баттастылар. Хампаанньа бу сылтан саҕалаан өрөспүүбүлүкэ социальнай-экономическэй сайдыытыгар күүскэ ылсыаҕа.
Аграфена КУЗЬМИНА, “Саха сирэ” хаһыат, edersaas.ru сайт
Санатан эттэххэ, Саха сирэ “Газпрому” кытары 2007 сыллаахха бииргэ үлэлэһэргэ илии баттаһан турар. Оттон 2014 с. Чайыҥдатааҕы гаас саппаастаах сири туһаҕа таһаарыы саҕаламмыта. Билигин бу бырагырааманан “Сибиир күүһэ” баараҕай тутуу ыытыллан, Илин Сибиири, Уһук Илини гаастааһын барыахтаах, ону сэргэ биһиги гааспыт Кытайга уонна Тиихэй акыйаан кыйа сытар атын дойдуларга экспортка тахсыахтаах. Онон бэҕэһээ баттаспыт дуогабардарыгар, бастатан туран, бу хайысхаҕа үлэлэһии күүскэ барыахтааҕа этилиннэ.
Манна Ил Дархан олохтоох каадырдары үлэҕэ ылыы боппуруоһун күүскэ туруоруста. Даҕатан эттэххэ, баараҕай бырайыакка хайаатар да олохтоох тэрилтэлэр, үлэһиттэр үлэлэһиэхтээхтэрин туһунан Ил Дархан быйыл кулун тутарга Алексей Миллеры кытары көрсүһүүтүгэр бэлиэтээн турар. Ол чэрчитинэн, билигин “Сибиир күүһүгэр” 15 тэрилтэ үлэлии-хамсыы сылдьар. Салгыы бу үлэ өссө кэҥиэхтээх.
Иккиһинэн, тулалыыр эйгэни харыстааһыҥҥа үлэ барыаҕа. Манна Егор Борисов Алексей Борисович болҕомтотун олохтоох омук төрүт дьарыгын чөл хаалларыыга, сири-уоту чинчийэн көрүүгэ хатаата.
Оттон бырагыраама туһунан эттэххэ, бу хайысханан “Газпром” өрөспүүбүлүкэҕэ 365 км усталаах гаас ситимин тардан, Алдан, Ленскэй, Нерюнгри, Өлүөхүмэ 29 нэһилиэнньэлээх пууннарыгар гааһы киллэриэҕэ. Манна олоҕуран өрөспүүбүлүкэ бэйэтин өттүттэн нэһилиэнньэлээх пууннарга бэйэлэригэр 396 км усталаах гаас ситимин тардарга былаанныыр. Бу бырагырааманан 6,6 тыһ. кыбартыыра уонна дьиэ, 90 хочуолунай гааска холбонуохтаахтар. Бу үлэ уопсай суумата 13,1 млрд солк. тэҥнэһэр.
Ону сэргэ “Газпром — оҕолорго” диэн бырагырааманан Ленскэйгэ, Чульмаҥҥа, Алдаҥҥа спортивнай эбийиэктэри тутар былааннаахтар. Ону таһынан Судаарыстыбаннаспыт 100 сылын көрсө торумнаммыт дьаһалларга кыттар санаалаах.
Түмүккэ Егор Борисов: “Бэҕэһээҥҥи үлэбит, “Газпрому” кытары дуогабар түһэрсиитэ, – бу биир эрэ күннээх үлэ буолбатах, бу – икки өттүттэн хас да ыйдаах тэҥҥэ үлэлэһиибит түмүгэ буолар. Дуогабарга кулун тутарга кэпсэппит этиилэрбитин барытын киллэттэрдибит. Мин санаабар, быйылгыттан саҕалаан хампаанньа өрөспүүбүлүкэ социальнай-экономическэй сайдыытыгар өссө улахан кылаатын киллэсриэҕэ”, — диэн бэлиэтээн этэр.
Аграфена КУЗЬМИНА, “Саха сирэ” хаһыат, edersaas.ru сайт