Үлэһиттэригэр ыйы-ыйынан хамнастарын төлөөбөт тэрилтэлэринэн борокуратуура уорганнара кимиилээхтик дьарыктаналлар.
Вера МАКАРОВА, «Саха сирэ» хаһыат, edersaas.ru
Ол курдук, Дьааҥы улууһун борокуратуурата «Янгеология» АУо үлэтин-хамнаһын бэрэбиэркэлээтэ. Ол бэрэбиэркэ кэмигэр биллибитинэн, бу тэрилтэ 141 үлэһитигэр хамнастарын төлөөбөккө, 4 мөл. солк. тахса иэстэммит.
Улуус борокуруора үлэһиттэр бырааптарын көмүскээн, «Янгеология» генеральнай дириэктэригэр бастаан сэрэтии киллэрбит.
Оттон үлэһиттэр хамнас ылар бырааптара хаттаан кэһиллибитигэр, борокуратуура «Янгеология» салайааччытыгар уонна юридическай сирэйгэ РФ Административнай кодексатын 5.27-с ыст. 7-с чааһынан административнай дьыала тэрийбит.
Дьыала көрүллэн, хамнаска иэс толору төлөммүт.
Бу туһунан СӨ Борокуратууратын пресс-сулууспата иһитиннэрдэ.
Вера МАКАРОВА, «Саха сирэ» хаһыат, edersaas.ru
Хаартыска: интернеттэн.