Саха сиригэр (ол иһигэр, өрөспүүбүлүкэ 25 улууһугар) гириип уонна ОРВИ ыарыылар муҥутуур боруогу үс төгүл аһардылар. Дьокуускайга ыарыһах ахсаана ааспыт нэдиэлэттэн 26% элбээтэ. Гириип сааһыттан тутулуга суох нэһилиэнньэ бары араҥатын хапта. Роспотребнадзор ыытар мониториныттан көрдөххө, муҥутуур боруок: 3-6 саастаахтарга – 65%, 7-14 саастаахтарга – икки төгүл, 15 саастан үөһээлэргэ 2,6 төгүл аһарылынна. Ол эбэтэр, тохсунньу 16-22 күннэригэр 13,5 тыһыынча киһи эмчит көмөтүгэр наадыйда.
Надежда ЕГОРОВА, «Саха сирэ» хаһыат, edersaas.ru
Өрө турбут дьаҥ киэҥник тарҕамматын туһугар, Дьокуускай кэнниттэн Нам улууһугар оскуолаларга үөрэх тохтотуллан, харантыын биллэрилиннэ. Оттон Ленскэй, Үөһээ Халыма, Булуҥ, Дьааҥы, Орто Халыма, Муома, Ньурба, Чурапчы, Сунтаар улуустарын сорох оскуолаларыгар уонна уһуйааннарыгар хааччахтыыр дьаһаллар ылылыннылар.
Манна даҕатан эттэххэ, ыарыы өрө туруор диэри Арассыыйа 56 мөлүйүөн киһитэ сыстыганнаах ыарыыттан харыстанар быһыыны ылбыта. «Арассыыйа бары регионнарыгар ыарыы өрө турар кэмэ ааһа илик, онон бүтэһиктээх түмүгү таһаарар эрдэ. Ол гынан баран, бүгүҥҥү күннээҕи туругунан эттэхпинэ, ыалдьыбыт дьон уопсай ахсааныттан 4 бырыһыаннара эрэ (былырыын – 2,8% этэ) быһыы ылбыта билиннэ», – диэн РФ Роспотребнадзорын салайааччыта Анна Попова иһитиннэрдэ.
Надежда ЕГОРОВА, «Саха сирэ» хаһыат, edersaas.ru