Горнай улууһун Аһыма бөһүөлэгэр гаас кириитин бэлиэтээтилэр. Ил Дархан эппит тылыгар турда, нэһилиэк олохтоохторо күөх төлөн сылааһын туһанар ыкахтаннылар. Аһыма бөһүөлэк олохтоохторун Саха Өрөспүүбүлүкэтин тыатын хаһаайыстыбатын миниистирин солбуйааччы Татьяна Осипова, Саха Өрөспүүбүлүкэтин бырамыысыланнаска уонна геологияҕа миниистири солбуйааччы Василий Захаров, «Сахатранснефтегаз» АУ сүрүн инженерэ Александр Гоголев уонна Горнай улууһун баһылыга Никита Андреев эҕэрдэлээтилэр.
— 2014 сыллаахха Ил Дархан Егор Борисов нэһилиэнньэ олохтоохторун кытта көрсүһүүгэ «гааһы 2016 сылга киллэттэриэм» диэн тылын биэрбитэ. Чахчы, 2016 сыллаахха Күрүөлээхтэн Аһымаҕа диэри 26,5 км уһуннаах гаас ситимэ тардыллыбыта. Аны билигин хас биирдии дьиэҕэ гаас киирэн эрэр. Саха өрөспүүбүлүкэтигэр гаас ситимин тардыытын 50 үбүлүөйдээх сылыгар биһиги нэһилиэкпитигэр маннык үөрүүлээх тэрээһин ыытыллара киһи сүргэтин көтөҕөр.
Саха Өрөспүүбүлүкэтигэр 400 нэһилиэктэн 96-та гаастааҕа Өрөспүүбүлүкэ дьаһалтатын дьаныардаах үлэтин көрдөрөр.
Николай Попов, «Саха сирэ» хаһыат, edersaas.ru
+1
+1
+1
+1
+1
+1
+1