Горнай улууһугар дьиэ кэргэннэри чиэстээтилэр

Ааптар: 
Бөлөххө киир:

Дьиэ кэргэн күнүгэр Горнай улууһугар дьиэ кэргэннэри үөрүүлээхтик чиэстээһин буолла.

edersaas.ru

Улуус муниципалитетын баһылыга Никита Андреев Үлэ сылынан сибээстээн, Дьиэ кэргэн династияларын бэлиэтээтэ. Ол курдук,  үлэ биир салаатыгар: тыа хаһаайыстыбатыгар, доруобуйа харыстабылыгар, култуураҕа, үөрэхтээһиҥҥэ, ис дьыала уорганнарыгар, сибээскэ уонна транспорга дьиэ кэргэнинэн уопсайа холбоон 100 сылтан ордук үлэлээбит 37 ыал Үлэ династияларын Бочуоттаах кинигэтигэр киллэриллиэхтэрэ.

24 ыал быйыл Тыа хаһаайыстыбатын министиэристибэтин нөҥүө 25 мөл.солк.  ИЖС субсидиятын ылбыттарын туһунан сибидиэтилистибэ туттулар. 

Улуустааҕы Оҕо библиотеката ыытар «Дьиэ кэргэнинэн ааҕабыт» куонкуруһугар 8 дьиэ кэргэн кыттыбытыттан: 1 миэстэҕэ Бэрдьигэстээхтэн — Даниловтар дьиэ кэргэн (Айгулья, Ваня, Сережа), 2 миэстэҕэ  Маҕарастан —  Никифоровтар дьиэ кэргэн, 3 миэстэҕэ  Бэс Күөлтэн —  Федоровтар дьиэ кэргэн (Диана, Айаана) бэлиэтэннилэр. 

«Тыа сирин ыала» куонкуруска бэйэлэрин бырайыактарын биэс ыалтан көмүскээн: 1 миэстэни Орто Суртан — Марфа уонна Михаил Текеяновтар  (6 оҕолоохтор), 2 миэстэни Бэрдьигэстээхтэн  Саргылана уонна Иван Васильевтар (5 оҕолоохтор), 3 миэстэни Бэс Күөлтэн — Диана уонна Леонид Федоровтар (7 оҕолоохтор) ылан, кыайыылааҕынан бэлиэтэннилэр. Бу дьиэ кэргэттэр б.дь. бэс ыйын 29 күнүгэр Бэрдьигэстээххэ ыытыллар өрөспүүбүлүкэтээҕи педагогическай дьаарбаҥкаҕа кыттарга путевканан наҕараадаланнылар.

  Дьиэ кэргэттэргэ араас айар эйгэҕэ 9 маастар-кылаас ыытылынна. Онно 44 киһи кыттыыны ылла. Араас тэрилтэттэн 9 анал идэлээх исписэлиис дьиэ кэргэттэр мунаарар боппуруостарыгар сүбэ-ама биэрдилэр.

Улуустааҕы киин балыыһаттан ийэлэрин кытта дьиэлэригэр тахсыыларыгар ЗАГС, психологическай киин үлэһиттэрэ уонна улуустааҕы дьахталлар сэбиэттэрэ үс саҥа күн сирин көрбүт Горнай улууһун саҥа гражданнарын үөрүүлээхтик чиэстээтилэр.

Ол курдук, Бэрдьигэстээхтэн Анна Гаврильева, Бэс-Күөлтэн Сайыына Саввина, Күөрэлээхтэн Олеся Жиркова кырачааннарын кытта Дьиэ кэргэн күнүгэр дьиэлэригэр тахсан, чугас дьоннорун үөртүлэр, — диэн иһитиннэрэр улуустааҕы муниципалитет  социальнай бэлиитикэ салаатын салайааччыта Ксения Васильева.

Ити курдук, Горнай улууһугар үгэс быһыытынан сыл аайы ыытыллар  Дьиэ кэргэннэри чиэстээһин быйыл эмиэ үрдүк таһымнаахтык ааста. 

Елена ПОТОЦКАЯ, «Саха сирэ» хаһыат, edersaas.ru

Хаартыскаҕа Ксения Васильева түһэриитэ.

+1
0
+1
0
+1
0
+1
0
+1
0
+1
0
+1
0