Граннаах бааһынайдар: Ударниктар охсуулаахтык үлэлииллэр

Ааптар: 
Бөлөххө киир:

Тыа хаһаайыстыбатын уонна ас-үөл бэлиитикэтин министиэристибэтин иһинэн үлэлиир бырагыраамаларга Томпо улууһун бааһынайдара кэлиҥҥи сылларга көхтөөхтүк кытталлар.

edersaas.ru


Ударник – балтараа сүүсчэкэ киһи олорор дьоҕус учаастага. Манна хамнастаах үлэни булар уустук буолан, олохтоохтор дьарыгы бэйэлэрэ тэринэллэр. Ол курдук, Петр Павлов, Айаал Кузьмин уонна Татьяна Келина 2016 с. саҥа саҕалыыр бааһынайдарга анаммыт бырагыраама гранын ыланнар, учаастакка сэргэхсийиини таһаардылар.

Идэтинэн физкультура учуутала Петр Павлов Байаҕантай нэһилиэгин баһылыгын солбуйааччынан үлэлээбитэ. Онтон дойдутугар олохсуйарга быһаарынан бааһынай хаһаайыстыбатын тэриммитэ, саҥа саҕалыыр бааһынайдарга анаммыт бырагыраамаҕа киирсэн, грант ылбыта. Ол харчытыгар тирэҕирэн, алта ынаҕы уонна тыраахтары атыылаһан, күүстээх үлэҕэ туруммута. Дьулуурдаах бааһынай билигин 24 ынах сүөһүнү, ол иһигэр 11 ыанар ынаҕы кыстатан турар. Хотоно эргэ буолан, саҥаны туттуон баҕарар. Былырыын 10 туонна үүтү туттарбыт. Сылгыһыт оҕото буолан, Петр кыра сааһыттан Дьөһөгөй оҕотугар сыстаҕас, билиҥҥитэ аҕыс сылгылаах.

Айаал Кузьмин бааһынай хаһаайыстыбатын тэриниэн иннинэ, Кириэс Халдьаайытааҕы «Илгэ» ПУо-ҕа слесарынан үлэлээбитэ. Граҥҥа ылбыт харчытынан эмиэ сүөһү атыылаһан, барыта 27 сүөһүлээх, ол иһигэр тоҕус ыанньыктаах. Ааспыт сыл устата 10 туонна үүтү соҕотуопкалаабыт. Сайын аймахтарын кытары 50 туоннаны оттоон, кыстыыр ото баар. Кузьминнар удьуор үлэһит ыаллар, уолларын оттуур тиэхиньикэнэн толору хааччыйбыттар, дьоҕус тыраахтары, от охсору уонна мунньары биэрбиттэр. Эдэр бааһынай гранынан «МТЗ-35» тыраахтары атыыласпыт, аны сайын саҥа хотон туттаары матырыйаалын хааччыммыт. Учаастак саамай сүрүн кыһалҕатынан ходуһа тиийбэтэ буолар эбит, ол иһин эдэр киһи быраҕыллыбыт сирдэри туһаҕа таһаарыы бырагырааматынан үлэлиэн баҕарар.

Татьяна Келина гранын харчытынан хотон туттубут итиэннэ уон ынаҕы атыыласпыт. Былырыын сэттэ туонна үүтү туттарбыт. Быйыл 28 сүөһүнү, ол иһигэр 12 ыанар ынаҕы кыстатан турар. Билиҥҥитэ биир ынаҕа төрөөбүт. Мантан саас эбии от атыылаһар былааннаах. Татьяна үлэтигэр кэргэнэ Николай уонна түөрт оҕото тирэх буолаллар. Үлэни бары саба түһэн бэрт түргэнник үмүрүтэллэр, оҕолор тыа сирин үлэтин билэ улааталлар.

Ударник эдэр бааһынайдара, дьэ, бу курдук охсуулаахтык үлэлии-хамсыы сылдьаллар. Кинилэр сыаллара дьэҥкэ – сүөһү ахсаанын элбэтии, грант ирдэбилин толоруу.

Евдокия НЕУСТРОЕВА, Томпо, edersaas.ru сайтка анаан.

+1
0
+1
0
+1
0
+1
0
+1
0
+1
0
+1
0