Быйылгы кыстыкка өрөспүүбүлүкэ үрдүнэн 1212 хочуолунай, 2629,6 км уһуннаах ититэр ситимнэр, 1164,7 км уу, 585,8 км уһуннаах канализационнай ситимнэр бэлэмнэммиттэрин туһунан СӨ дьиэ-уот, коммунальнай хаһаайыстыба уонна энергетика миниистирэ Гаврил Левин иһитиннэрдэ.
Анивера АКИМОВА, “Саха сирэ” хаһыат, edersaas.ru
Бүгүҥҥү туругунан өрөспүүбүлүкэ 35 муниципальнай тэриллиитигэр ититии холбоммут. Сайын устата уу суолунан 407127 тонна таас чох, 30252 тонна инчэҕэй ньиэп, 32609 тонна гаас конденсаата, 72476 тонна дизельнэй уматык тиэллибит.
«Коммунальнай өҥө иһин иэс-күүс элбии турар. Аҥардас нэһилиэнньэ иэһэ 2 млрд солк. тиийдэ. Оттон салайар хампаанньалар, ТСЖ-лар иэстэрэ эмиэ миллиарды куоһарда«, — диэн Гаврил Прокопьевич этэр.
Миниистир суруналыыстарга иһитиннэрбитинэн, 2017 сылга коммунальнай хаһаайыстыба, энергетика салааларынан 34 эбийиэк үлэҕэ киллэриллиэхтээх. Ол иһигэр икки дизельнэй станция, «Золотинка – Иенгра» хайысхатынан 10 кВ. үрдүк күүрүүлээх уот ситимэ уонна да атын тутуулар. Оттон күүтүүлээх-кэтэһиилээх иккис нүөмэрдээх ГРЭС алтынньыга үлэҕэ киллэриллиэхтээх.
Анивера АКИМОВА, “Саха сирэ” хаһыат, edersaas.ru
Хаартыска: ЯСИА