Бүгүн, муус устар 4 күнүгэр, Дьокуускайдааҕы 2-с №-дээх уот ыстаансыйатын (ГРЭС-2) дириэктэрэ Руслан Исхаков суруналыыстарга ыстаансыйаны көрдөрдө уонна ыйытыыларга хоруйдаата. Кини этэринэн, 2018-2019 сыллартан саҕалаан уотунан хааччыйыы үлэтэ тупсуоҕа.
Руслан Исхаков суруналыыстарга ыстаансыйа туһунан кэпсээтэ. Саҥа ньыманан оҥоһуллубут. Сэтинньи 1 күнүттэн үлэҕэ киирбит ыстаансыйа бүгүҥҥү күҥҥэ диэри 5-тэ арахса сылдьыбыт. Хас биирдии арахсыы араас биричиинэлээх. Эбийиэк саҥа буолан, тургутууну бара турар диир. Итиэннэ ыстаансыйа үлэтин өссө тупсаран биэрэбит диэн бэлиэтиир.
Аян Григорьев, электро-тэхиньиичэскэй сулууспа салайааччыта:
— Ыстаансыйа икки дьиэнэн үлэлиир. Кылаабынай куорпуска түөт газотурбиннай туруоруулар бааллар. Оттон уоту биэрэр аппарааттар дьиэлэригэр уот ситимнэрин харыстыыр установкалар бааллар. Гааһынан үлэлиир генератор уот таһааран ыстаансыйаны уотунан хааччыйар. Уопсайа түөрт симиэнэ үлэлиир. Биир симиэнэҕэ 17 киһи баар.
Санатан эттэххэ, Дьокуускайдааҕы уот ыстаансыйата Дьокуускай куораты, Амма, Горнай, Мэҥэ Хаҥалас, Нам, Таатта, Томпо, Уус Алдан, Уус Майа, Хаҥалас уонна Чурапчы улуустарын уотунан хааччыйар.
Николай ПОПОВ, «Саха сирэ» хаһыат, edersaas.ru