Бүгүн СӨ Бырабыыталыстыбатын бэрэссэдээтэлэ Евгений Чекин ГРЭС саахалланыытыгар суһал мунньах ыытта.
edersaas.ru
1-кы вице-премьер Алексей Колодезников, билиҥҥи туругунан бары туһанааччылар уотунан, сылааһынан, уунан хааччыллыбыттарын, итини тэҥэ, резервнэй станциялар үлэлэрэ Амма, Чурапчы, Уус Алдан улуустарыгар тохтотуллубутун туһунан иһитиннэрдэ. Дьокуускайдааҕы саҥа ГРЭС-2 икки турбинатын үлэлэтэн, Хаҥалас уонна Мэҥэ Хаҥалас улуустарын уотунан хааччыйбыттар.
«Билигин ГРЭС-2 үлэ бара турар. 72 чааһынан сүрүн станцияҕа холбонуу барыаҕа, онно 11-с турбинаҕа өрөмүөн ыытыллар. Өссө иккини көрө сылдьаллар», – диэн Алексей Колодезников иһитиннэрдэ.
Евгений Чекин министиэристибэ салайааччыларыттан балаһыанньаны ыйыталаста. Барыта этэҥҥэ үлэлии турар диэн эттилэр. Сибээскэ уонна информационнай технологияларга миниистир Александр Борисов, ТТК оптическай магистральнай ситимигэр кыра алдьаныы тахсыбытын этэн туран, ол төрүөтүн, биричиинэтин быһаарыы бара турарын иһитиннэрдэ.
Бэҕэһээ «Триумфка» Коркин турнирыгар резервнэй станция ыксаллаах түгэҥҥэ тоҕо үлэлээбэтэҕэй диэн ыйытыыга, «Ыксаллаах түгэҥҥэ тустаах үлэһиттэр бэлэмэ суохтар этэ», – диэн Алексей Колодезников эттэ.
«Билигин өссө төгүл балаһыанньаны үчүгэйдик сыныйан көрүөххэ наада», – диэн Евгений Чекин түмүккэ эттэ.
«Саха сирэ» хаһыат, edersaas.ru
Хаартыска Интернет ситимиттэн ылынна.