Биллэрин курдук, бэҕэһээ, бу дьыл алтынньы 1 күнүгэр, Дьокуускай куоракка ГРЭС-1 улахан саахал тахсыбыта.
Вера МАКАРОВА, «Саха сирэ» хаһыат, edersaas.ru
Бу чахчынан өрөспүүбүлүкэ борокуратуурата Ростехнадзор испэсэлиистэрин кытта бэрэбиэркэ саҕалаабыта. Быһылаан буолбут сиригэр Дьокуускай куорат борокуруора уонна өрөспүүбүлүкэ борокуратууратын салалтата тиийбиттэрэ.
Бэрэбиэркэ түмүгүнэн, онно төрүөт баар буоллаҕына, борокуратуура миэрэ ылыаҕа. Бу быһыы-майгы өрөспүүбүлүкэ борокуруорун э.т. Айдар Иванов хонтуруолугар сылдьар.
Оттон силиэстийэ уорганнара саахал чахчытынан РФ Холуобунай кодексатын 216-с ыст. 1 чааһынан холуобунай дьыала тэрийдилэр. Ол эбэтэр, үлэ ыытыллар кэмигэр куттал суох буолуутун быраабылаларын кэһии бэлиэтэ баарынан.
Силиэстийэ сабаҕалыырынан, 2017 сыл алтынньы 1 күнүгэр, киэһэ 16.00 чаас саҕана, «Якутскэнерго» ГРЭС-1 машиннай саалатыгар саахал тахсан, үлэһит эчэйбит, билигин кини реанимацияҕа ыарахан туруктаах сытар.
Саахал тахсыбытын түмүгэр, Дьокуускай куорат уонна чугас сытар улуустар уота, уута, сылааһа суох хаалбыттар.
Бу туһунан өрөспүүбүлүкэ борокуратуурата уонна РФ Силиэстийэлиир кэмитиэтин Саха сиринээҕи управлениета иһитиннэрдилэр.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.