Алтынньы 1 күнүгэр ГРЭС-1 тахсыбыт саахал кэнниттэн уот бараатын кытары Дьокуускай куорат балыыһалара автономнай холбонууга көспүттэрэ. Онон, ханнык да үлэ былаана тохтотуллубата.
edersaas.ru
Хаан сулууспатын үлэтигэр эмиэ туох да харгыстааһын тахсыбата. Хаан препараттара бары криохранилищеларга хараллаллар. Онон, саахалга эмсэҕэлээбит киһиэхэ суһаллык хаан наадатын, хаан сулууспатыгар хаан тиийбэтин туһунан социальнай ситимнэргэ тарҕаммыт сурахтар оруна суохтар.
Саахал кэмигэр эмсэҕэлээбит эр киһи тута Өрөспүүбүлүкэтээҕи 2 №-дээх балыыһа-Суһал медицинскэй көмө киинин реанимация отделениетыгар аҕалыллан, интенсивнэй терапия көмөтүнэн күүскэ эмтэнэр. Кини туруга билигин «куһаҕана суох динамикалаах олус ыарахан туруктааҕынан» сыаналанар.
СӨ Доруобуйа харыстабылын министиэристибэтин кэлэктиибэ уонна эмчиттэр хаан туттарарга мэлдьи көхтөөхтөр. Быраас аан дойдутааҕы күнүгэр эмиэ хаан туттардылар.
«Араас саахал, техногеннай алдьархай, бэл байыаннай дьайыылар кэмнэригэр медицинскэй тэрилтэлэр үлэлэрэ күннээҕи режимтэн уларыйбат. Ол биһиги иэспит. Онон Дьокуускайга тахсыбыт саахал кэнниттэн эмтиир тэрилтэлэр автономнайга холбонон, үлэ атахтаммата», – диэн СӨ доруобуйа харыстабылын миниистирин солбуйааччы Людмила Вербицкая быһаарда.
Надежда ЕГОРОВА, «Саха сирэ» хаһыат, edersaas.ru