Гроссмейстер Гаврил Колесов — аан дойду чөмпүйэнээтин кыһыл көмүс уонна үрүҥ көмүс мэтээллэрин хаһаайына

Алтынньы 19 – 29 күннэригэр Санкт-Петербург куоракка 64 харахтаах дуобакка эр дьон уонна дьахталлар ортолоругар аан дойду чөмпүйэнээтэ ыытылынна.

“Москва” гостиница “Кремлевскай” мунньахтыыр саалатыгар 43 дойду күүстээх дуобатчыта классическай, түргэн уонна блиц көрүҥнэргэ ким чулуутун быһаарыста. Манна Саха сириттэн үс дуобатчыт  — Гаврил Колесов, Николай Стручков уонна Николай Гуляев  — күрэстэстэ.

Эрдэ иһитиннэрбиппит курдук, блицкэ эр дьоҥҥо биир дойдулаахпыт гроссмейстер Гаврил Колесов 74 күрэстэһээччиттэн бастакы миэстэни ылла. Игорь Михальченко (Беларусь), Олег Дашков (Арассыыйа) иккис, үһүс буоллулар.

Түргэн оонньууга Белоруссия дуобатчыта Игорь Михальченко кыайыылааҕынан буолла. Гаврил Колесов – иккис, Сергей Белошеев (Арассыыйа) үһүс миэстэлэргэ таҕыстылар.

Дьахталларга бу икки көрүҥҥэ Елена Сковитинаҕа (Молдова) тэҥнэһэр дуобатчыт көстүбэтэ.

Классическай оонньууга Игорь Михальченко (Беларусь), Жанна Саршаева (Арассыыйа) бастаатылар.

Роман Попов, “Саха сирэ” хаһыат