Быйылгыттан ыла Хаҥалас улууһун дьахталларын сэбиэтин Фекла Варламова салайар. Бу күннэргэ уопсастыбаннай түмсүү бэйэтин эмблематын сүрэхтээтэ.
edersaas.ru
— Ханнык баҕарар уопсастыбаннай тэрилтэ бэйэтэ устааптаах, балаһыанньалаах, эмблемалаах буолуохтаах. Ол ону өйдөөн, мин кулун тутартан, Дьахтар сэбиэтин бэрэссэдээтэлинэн талыллаат, Хаҥалас улууһуттан төрүттээх норуот маастара Олег Соловьеву кытта кэпсэтэн, сакаас оҥорбутум. Хаҥалас улууһун олохтоохторо үс үллэр үөстээх Өлүөнэ өрүс сүнньүгэр олорор буолан, Эбэбит символын эмблемэбитигэр анаан киллэрдибит. Дьахталлар түмсүүлэрин сирэйдиирбит быһыытынан, дьахтар мөссүөнэ сүрүн оруолу ылар. Кини Хаҥалас улууһун эрэ буолбакка, Саха сирин бүттүүнүн киэн туттуутун — Өлүөнэ очуостарын утары одуулаан олорор Саха дьахтарын уһун суһуоҕа – кини сүрүн киэргэлэ, киэн туттуута. Эмблемаҕа очуос биэс салаатын киллэрдибит. Бу дьахтар биэс тарбаҕа. Ол эбэтэр биэс салаа тарбаҕын холбоон, дьахтар сиэркилэҕэ бэйэтин сэбэрэтин көрүнэр. Сиэркилэ – ыраас уу, кэрэ айылҕа туоһута. Биэс салаа – Хаҥалас дьахтарын төрүүр-ууһуур аналын туоһута. Бу — кини оҕолоро, кэнэҕэс ыччаттара, — диэн кэпсиир Фекла Варламова.
Араас тэрээһиннэргэ Хаҥалас улууһугар дьахталлар сэбиэттэрэ нэһилиэктэринэн бэйэлэрэ тус көстүүмнээх сылдьааччылар. Бу күнтэн ыла кинилэр аны улуус дьахталларын сэбиэтин эмблематын түөстэригэр киэн тутта иилиниэхтэрэ.
Елена ПОТОЦКАЯ, «Саха сирэ» хаһыат, edersaas.ru