Хаҥалас Үөдэйигэр баһылыгынан Латышев оннугар Латышев буолла

Бөлөххө киир:

Хаҥалас улууһугар 6 нэһилиэк баһылыга, сэттэ нэһилиэккэ уонна Покровскай куоракка дьокутааттар талылыннылар. Нэһилиэк баһылыгын быыбарыгар кырата суох киирсии буолла.

 Аграфена КУЗЬМИНА, “Саха сирэ” хаһыат, edersaas.ru.

Күөрдэмҥэ түөрт кандидат турбутуттан үһэ кыттыбыта. Быыбардааччылар 40,09 % ылан, “Сайдыы” ТХПК бэрэссэдээтэлэ Александр Константинов баһылыгынан талылынна. Манна “барыларын утарабын” диэн графа иккис мисэтэҕэ иһэр. Быыбардааччылар 32,33 % кандидаттары барыларын утардылар.

Хачыкаакка үс кандидат кыттыбытыттан баһылык Ирина Оболкина дуоһунаһыгар хаалла. Нөмүгүгэ нэһилиэк баһылыгын солбуйааччынан үлэлии олорбут Наум Устинов эрэллээх кыайыыны ситистэ. Киниэхэ быыбардааччылар 41,05 % куоластаата. Төхтүргэ эмиэ баһылык солбуйааччыта таҕыста. Кэскил Ивановка 256 киһи куолаһын биэрдэ.

Өктөмҥө кытаанах быыбар буолла. Түөрт кандидат докумуонун биэрбититтэн иккитэ туораан, бүтэһиккэ баһылык Александр Большаков исписэлииһин Борис Христофоровы кытары киирсэр буолбута. Ол түмүгэр Александр Николаевич 126 куолаһынан баһыйан, дуоһунаһыгар хаалла.

Ону сэргэ Үөдэйгэ интэриэһинэй быыбар ааста: түөрт кандидат регистрацияламмытыттан иккитэ – Латышевтар, иккитэ – Филипповтар. Быыбар түмүгүнэн көрдөххө, Латышевтар бастакы-иккис миэстэни, Филипповтар үсүһү-төрдүһү былдьастылар. Дмитрий Латышевка – 93, Прокопий Латышевка – 60, Егор Филипповка – 44 уонна Роман Филипповка – 35 киһи куоластаабыт. Онон Латышевтартан эдэрдэрэ – Дмитрий Латышев баһылыгынан талылынна.

Аграфена КУЗЬМИНА, “Саха сирэ” хаһыат, edersaas.ru.

+1
0
+1
0
+1
0
+1
0
+1
0
+1
0
+1
0