Хаҥалас улууһугар эр дьон, аҕалар түмсүүлэрэ үлэлэрин сөргүтэн, көхтөөхтүк ылсан үлэлээн эрэллэр. Билигин улууска Өрөспүүбүлүкэтээҕи аҕалар иккис сийиэстэригэр бэлэмнэнии үлэтэ күргүөмнээхтик ыытыллан эрэр. Төхтүр нэһилиэгэр бу сылы Эр дьон сылынан биллэрэн, уопсастыбаҕа эр киһи, аҕа оруолун үрдэтэргэ туһуламмыт үлэ салҕанар.
Ангелина Васильева, “Саха сирэ” хаһыат, edersaas.ru
Ити үлэ былырыыҥҥыттан саҕаламмыта. Улуус баһылыга Гаврил Алексеев былырыын кулун тутар ыйга дьаһал таһааран, муус устарга аҕалар кэмпириэнсийэлэрэ буолбута. Онно хамыыһыйа тэриллэн, бэрэссэдээтэлинэн Олег Иванов талыллан үлэтин саҕалаабыта, улуус дьаһалтатын иһинэн “Аҕалар сүбэлэрэ” уопсастыбаннай түмсүү тэриллибитэ.
Онтон улуус нэһилиэктэрин барытын хабар сыалтан, быйыл тохсунньуга аҕалар бастакы форумнара буолбута. Нэһилиэктэр Эр дьон түмсүүлэрин түмэн, улуустааҕы “Аҕа сүбэтэ” уопсастыбаннай хамсааһын тэринэн, устааптарын регистрациялата биэрбиттэрэ.
Нэһилиэктэр Эр дьон түмсүүлэриттэн бырабылыанньа талыллан, сыллааҕы былаан оҥоһуллан, тигинэччи үлэлээн эрэллэр. Түөрт нэһилиэккэ кэрэ аҥаардарга анаан эр дьон кэнсиэр туруордулар, Аҕа дойдуну көмүскээччилэр күннэригэр оскуола оҕолоругар тэрээһин ыыттылар. Билигин Булчуттар уонна Аҕалар күннэригэр күрэхтэһии ыытаары бэлэмнэнэ сылдьаллар.
Кулун тутар 25 күнүгэр Өрөспүүбүлүкэтээҕи аҕалар иккис сийиэстэригэр дэлэгээттэри талар сыаллаах аҕалар улуустааҕы форумнара буолуоҕа. Бу күн нэһилиэктэртэн көхтөөх аҕалар уолаттарын кытта күрэхтэһиилэрэ буолуо. Онон Хаҥалас аҕалара күргүөмүнэн турунан, көхтөөхтүк ылсан, бэйэлэрин көрдөрөн эрэллэр. Эр киһи туруннаҕына, ытарчалыы ыллаҕына, туохтан да толлубат, барыны кыайар диэн мээнэҕэ эппэтэхтэрэ, онон элбэххэ эрэнэбит.
Ангелина Васильева, “Саха сирэ” хаһыат, https://edersaas.ru