Бэҕэһээ Хаҥалас улууһун булчуттара Өлүөнэ өрүс арыытыгар Кыһыл кинигэҕэ киирбит көтөрдөрү бултаабыттарын туһунан иһитиннэриини таһаарбыппыт. Санатар буоллахха, ааспыт нэдиэлэҕэ СӨ Айылҕа харыстабылын министиэристибэтин уонна СӨ Росгвардиятын управлениетын исписэлиистэрэ бөртөлүөтүнэн Өлүөхүмэ уонна Хаҥалас улуустарыгар рейдэ оҥорон, булт быраабылатын кэһии төһө тахсарын бэрэбиэркэлээбиттэрэ.
Александр ТАРАСОВ, «Саха сирэ» хаһыат, edersaas.ru
«Криолитозона биологическай проблемаларын институтугар бултаныллыбыт көтөрдөрү бэрэбиэркэҕэ биэрбиппит түмүгэ бүгүн билиннэ. 11 хоҥор хаастан биирэ ойуур хааһа (таежнай) диэн быһаарбыттар. Итини тэҥэ, 11 тыһы чөккөөкүнү уонна биир мородуну бултаабыттар. Биир хаас хоромньутун төлөбүрэ 2 тыһ. 500 солк. Ойуур хааһа Саха сирин, оттон мороду Россия Кыһыл кинигэлэригэр киирэллэр. Билигин бу тахсыбыт дьыаланы Хаҥалас улууһун полициятыгар биэриэхпит», – диэн СӨ булт управлениетын салайааччытын солбуйааччы Дьулустаан Дьяконов быһааран биэрдэ.
Хаҥалас улууһугар булчуттар Кыһыл кинигэҕэ киирбит көтөрдөрү бултаабыттар
Александр ТАРАСОВ, «Саха сирэ» хаһыат, edersaas.ru